Մթերքներ, որոնք վնասակար են ատամների համար․ բժշկի խորհուրդները

Մրգերը, թթու մթերքները, քաղցր ըմպելիքները և կոնֆետները մեծացնում են ատամի էմալի ծակոտկենությունը՝ հեռացնելով դրանից հանքանյութերը, մինչդեռ կալցիումի և ֆոսֆորի պարունակությամբ մթերքները օգնում են լրացնել «բացերը»։ Այս մասին Gazeta.ru-ին պատմել է բժիշկ– օրթոդոնտ Ալենա Կոպետսկայան։

Մասնագետի խոսքով՝ ատամները առողջ պահելու համար անհրաժեշտ է ոչ միայն պահպանել հիգիենան, այլև սահմանափակել էմալի համար վնասակար մթերքների օգտագործումը։ Դրանց թվում են քաղցր ըմպելիքները, քաղցրավենիքը, մրգերը, կիտրոնի հյութը և քացախը։

«Թթուն և շաքարը կարող են նպաստել էմալի դեմիներալացմանը, այսինքն՝ դրա ծակոտկենության մեծացմանը։ Իսկ ծակոտկեն էմալը պակաս դիմացկուն է մանրէների ազդեցությանը», - ասել է մասնագետը։

Մասնագետի խոսքով՝ շաքարը լրացուցիչ ուժեղացնում է պաթոգեն մանրէների քայքայիչ ազդեցությունը բերանի խոռոչում։ Այն նպաստում է ատամնափառի առաջացմանը, որով սնվում են մանրէները։

«Որքան շատ շաքար կա ատամների մակերեսին, այնքան արագ են բազմանում մանրէները և այնքան ավելի ագրեսիվ է դրանց ազդեցությունը», - պարզաբանել է Կոպետսկայան։

Ատամները ամրացնելու համար մասնագետը խորհուրդ է տվել օգտագործել ֆտոր պարունակող մածուկներ և անել ողողումներ: Նա նաև հորդորել է պարբերաբար սննդակարգում ներառել կալցիումով և ֆոսֆորով հարուստ սնունդ (օրինակ՝ կաթնաշոռ, ձուկ և պանիր):