Հունիսին Հյուսիսատլանտյան դաշինքը առաջին անգամ Ֆինլանդիայի տարածքից կարձակի RQ-4D Phoenix խոշոր հետախուզական անօդաչու թռչող սարքեր։ Այս մասին հայտնել է Yle հեռուստառադիոընկերությունը՝ հղում անելով աղբյուրներին։
Նրանց խոսքով՝ փորձնական արձակումները տեղի կունենան մի քանի շաբաթվա ընթացքում երկրի հարավ-արևմուտքում գտնվող Պիրկկալա ավիաբազայում։ Անհրաժեշտ ենթակառուցվածքները ներկայումս կառուցվում են։ Ինչպես նշում է Yle-ն, ՆԱՏՕ-ն հետաքրքրված է Ֆինլանդիայի տարածքից անօդաչու թռչող սարքեր արձակելով, քանի որ դա թույլ կտա ավելի երկար թռիչքներ հյուսիսային շրջաններում, այդ թվում՝ Նորվեգական ծովում։
Ամերիկյան Northrop Grumman ընկերության կողմից արտադրվող RQ-4D Phoenix հետախուզական անօդաչու թռչող սարքերի թռիչքի շառավիղը 16 հազար կմ է։ ՆԱՏՕ-ի կայքէջի տվյալներով՝ դրանք կարող են բարձրանալ մինչև 18 կմ բարձրության և առանց վայրէջքի մնալ ինքնավար թռիչքի մեջ ավելի քան 30 ժամ։
Ինչպես հաղորդում է Yle-ն, RQ-4D Phoenix-ը ներկայումս տեղակայված է իտալական Սիցիլիա կղզում, բայց 2023 թվականի աշնանից սկսած դրանք պարբերաբար կմտնեն Ֆինլանդիայի օդային տարածք։
Հեռուստառադիոընկերության աղբյուրները նշել են, որ դաշինքը քննարկում է իր հետախուզական անօդաչու թռչող սարքերի համար երկրորդ բազա ստեղծելու հնարավորությունը, չնայած շինարարության մեկնարկի և բազայի հնարավոր տեղակայման վերաբերյալ որոշում դեռևս չի կայացվել։
Ավելի վաղ Ֆինլանդիայի իշխանությունները Հյուսիսատլանտյան դաշինքին առաջարկել էին նման բազա տեղադրել իր տարածքում։ Ինչպես նշվեց, Պիրկկալան համարվում է դրա համար ամենահարմար վայրը։ Նորվեգիան և Լեհաստանը նույնպես հետաքրքրություն են ցուցաբերում նախագծի նկատմամբ։
