Դիետիկ գազավորված ըմպելիքների, այդ թվում՝ հայտնի Coca-Zero-ի, օգտագործումը պետք է սահմանափակվի օրական մեկ տարայով։ Սա կօգնի խուսափել քաղցրացուցիչների և ֆոսֆորական թթվի պոտենցիալ վնասակար ազդեցությունից։ Այս մասին WellnessPulse-ին պատմել է բժշկական գիտությունների դոկտոր, սննդաբան Ալեքսանդրա Գինոսը (ԱՄՆ):
Մասնագետի խոսքով՝ նման ըմպելիքների հիմնական քաղցրացուցիչներն են ասպարտամը և ացեսուլֆամ կալիումը (Ace K)՝ շաքարի փոխարինիչներ, որոնք պահպանում են քաղցր համը՝ առանց կալորիաների։ Չնայած ԱՄՆ Սննդի և դեղերի վարչությունը (FDA) հաստատել է դրանց օգտագործումը սննդամթերքում, դրանց երկարաժամկետ անվտանգության վերաբերյալ հարցերը մնում են։
2021 թվականի գիտական ակնարկը պարզել է, որ ասպարտամը կարող է կապված լինել մի շարք հիվանդությունների զարգացման հետ, այդ թվում՝ ճարպակալման և 2-րդ տիպի շաքարախտի։ Կան նաև ապացույցներ, որ այս շաքարի փոխարինիչն ունի գենոտոքսիկ հատկություններ՝ կենդանի բջիջների գենետիկական նյութին վնաս հասցնելու ունակություն:
2022 թվականին British Medical Journal-ում հրապարակված մեկ այլ խոշոր ուսումնասիրություն հնարավոր կապ է հայտնաբերել արհեստական քաղցրացուցիչների մեծ քանակությամբ օգտագործման և սրտանոթային հիվանդությունների առաջացման ռիսկի բարձրացման միջև, մասնավորապես՝ ասպարտամի, ացեսուլֆամ կալիումի և սուկրալոզի դեպքում։
Բժիշկը հավելեց, որ դիետիկ գազավորված ըմպելիքը պարունակում է ֆոսֆորական թթու, որը բարելավում է համը և գործում է որպես պահպանիչ։ Սակայն 2017 թվականի մի ուսումնասիրություն պարզել է, որ ֆոսֆորով հարուստ սննդամթերքի օգտագործումը կարող է նպաստել ատամների փչացման զարգացմանը։
Չնայած ազդեցության ուղղակի մեխանիզմները դեռևս լիովին հասկանալի չեն, սննդաբանը խորհուրդ է տալիս զգուշություն ցուցաբերել։ Մասնագետը նշում է, որ FDA-ն անվտանգ է համարում օրական մեկ տուփ դիետիկ գազավորված ըմպելիք խմելը։ Սննդաբանը խորհուրդ տվեց ուշադրություն դարձնել ըմպելիքի այլ համեղ այլընտրանքներին՝ համեմված թեյին և մրգային ջրին։
Թարգմանությունը՝ Euromedia24.com-ի
