Սիրիայի կառավարությունը և Դամասկոսի արվարձանում գտնվող Ջարամանա քաղաքի դրուզների ավագները համաձայնության են եկել իշխանություններին ծանր սպառազինության անհապաղ փոխանցման և իրավիճակի կարգավորման վերաբերյալ, ասել է Դամասկոսի Ռիֆ նահանգի անվտանգության վարչության ղեկավար Հուսամ ալ-Թահանը։
Երեքշաբթի օրը բախումներ են սկսվել Սահնայային հարակից Ջարամանա քաղաքում, որտեղ դրուզների ուժերը թույլ չեն տվել զինված ոչ կառավարական ուժերի մուտքը քաղաք։
Պաշտոնական իշխանությունները, իրենց հերթին, հայտարարել են, որ ուժայինները զինված հակամարտության կողմ չեն և ուղարկվել են ամրապնդելու և կարգուկանոն հաստատելու։
Երեքշաբթի երեկոյան սիրիական կառավարությունն ու Դամասկոսի Ջարամանա արվարձանի ավագները պայմանավորվածություն են ձեռք բերել քաղաքում անվտանգությունն ուժեղացնելու և բախումների պատճառ դարձած վերջին իրադարձությունների մեղավորներին պատասխանատվության ենթարկելու վերաբերյալ:
Այնուամենայնիվ, մարտերը շարունակվեցին այլ շրջաններում, որտեղ ապրում են դրուզները: Զինված հակամարտության պաշտոնական պատրվակը սոցիալական ցանցերում հրապարակված աուդիո ձայնագրությունն էր, որում դրուզների հավատքի ներկայացուցիչն իբր վիրավորում է Մուհամեդ մարգարեին, ինչը անկարգություններ է առաջացրել Սիրիայի տարբեր քաղաքներում՝ Սիրիայում դրուզներին սպանելու կոչերով:
