Հունգարիան և Ղազախստանը աջակցում են Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի, ինչպես նաև արտգործնախարարներ Սերգեյ Լավրովի և Մարկո Ռուբիոյի միջև ուկրաինական հակամարտության կարգավորման բանակցություններին։ Այս մասին Ղազախստան կատարած այցի ժամանակ լրագրողներին ասել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն։
«Այսօր մենք շատ մանրամասն խոսեցինք ուկրաինական պատերազմի մասին: Այս պատերազմի արդյունքում մեր երկրները տուժեցին, ուստի, մեր երկուստեք շահագրգռվածությունն է, որ պատերազմն Ուկրաինայում հնարավորինս շուտ ավարտվի:
Մենք ողջունում ենք Ռուսաստանի և ԱՄՆ-ի միջև ամենաբարձր մակարդակով երկխոսությունը, ուրախ ենք, որ Դոնալդ Թրամփն ու Վլադիմիր Պուտինը երկար քննարկել են արդիական հարցեր, և մենք նաև շատ ուրախ ենք, որ որպես այս բանակցությունների շարունակություն, արտգործնախարարներ Մարկո Ռուբիոն և Սերգեյ Լավրովը նույնպես բանակցություններ են վարել և քննարկել Ուկրաինայի հակամարտության հնարավոր լուծումը,-Ղազախստանի փոխվարչապետ, արտաքին գործերի նախարար Մուրատ Նուրթլեուի հետ բանակցություններից հետո լրագրողներին ասել է Սիյարտոն։
Նուրթլեուն ասել է նաև, որ Աստանան ողջունում է բանակցությունները՝ նշելով, որ դրանց շնորհիվ հակամարտությունը դադարեցնելու հույս կա։
