ԱՄՆ նախագահ Դոնալդ Թրամփի վարչակազմը նախատեսում է աշխատանքից ազատել Առողջապահության և հասարակական ծառայությունների նախարարության հազարավոր աշխատակիցների։ Այս մասին հինգշաբթի օրը հայտնել է The Wall Street Journal-ը՝ հղում անելով աղբյուրներին։
Սպիտակ տունն արդեն պատրաստում է գործադիր հրաման, որի ստորագրումից հետո Հիվանդությունների վերահսկման և կանխարգելման կենտրոնները, Սննդի և դեղերի վարչությունը և ԱՄՆ առողջապահության նախարարության մի շարք այլ գերատեսչություններ պետք է կրճատեն իրենց անձնակազմը։ Գործադիր հրամանը կարող է ստորագրվել հաջորդ շաբաթ, երբ ավարտվի հետաձգված ազատման առաջարկը, որը թույլ է տալիս դաշնային կառավարության աշխատակիցներին կամավոր լքել իրենց աշխատանքը՝ ութ ամսվա վարձատրության դիմաց:
Հինգշաբթի ավելի վաղ, Մասաչուսեթս նահանգի Բոստոն քաղաքի դաշնային դատարանը կառավարության աշխատակիցների՝ փոխհատուցման դիմաց հրաժարականի դիմում ներկայացնելու վերջնաժամկետը երկարաձգեց մինչև փետրվարի 10-ը:Հնարավոր է, որ երկուշաբթի օրը կայանալիք դատական նիստից հետո, այդ օրը կրկին հետաձգվի։ NBC հեռուստատեսության տվյալներով՝ ավելի քան 60 հազար մարդ արդեն համաձայնել է աշխատանքից ազատմանը։
