Բանգլադեշի արտաքին գործերի նախարարությունը իր մոտ է կանչել երկրում Հնդկաստանի դիվանագիտական առաքելության ղեկավարի պաշտոնակատարին և խիստ բողոք հայտնել հանրապետությանը՝ կապված հրաժարականից հետո Հնդկաստանի տարածքում բնակվող նախկին վարչապետ Շեյխ Հասինայի՝ սոցիալական ցանցերում ելույթների տարածման հետ։ Այս մասին լրագրողներին հայտնել է Բանգլադեշի ժամանակավոր կառավարությունում արտաքին գործերի նախարարության ղեկավար Թուհիդ Հոսեյնը։
Նա ասել է, որ նախարարությունը բողոքել է Հնդկաստանին «կեղծ և շինծու» մեկնաբանությունների և հայտարարությունների համար, որոնք Հասինան անընդհատ անում է տարբեր հարթակներում: Ըստ Դաքայի, նրա հայտարարությունները Բանգլադեշում անկայունություն են հրահրում։
Բողոքի նոտայում, որը ներկայացվել է Դաքայում Հնդկաստանի Գերագույն հանձնակատարի պաշտոնակատար Պավան Բադեին, նախարարությունը խորը մտահոգություն և հիասթափություն է հայտնել, քանի որ «նման հայտարարությունները վնասում են Բանգլադեշի ժողովրդի զգացմունքները»:
Գերատեսչությունը նաև ընդգծել է, որ նման գործողությունները համարվում են թշնամական գործողություն Բանգլադեշի նկատմամբ և չեն նպաստում երկու երկրների միջև բարիդրացիական հարաբերություններ հաստատելու ջանքերին։
