ԱՄՆ պետքարտուղարությունը հայտնել է, որ Միացյալ Նահանգների կառավարությանը պատկանող նավերն այսուհետ կկարողանան Պանամայի ջրանցքով անցնել անվճար, սակայն Պանաման հերքել է այս լուրերը։
«Միացյալ Նահանգների կառավարության նավերն այժմ կարող են անցնել Պանամայի ջրանցքով առանց վճարի գանձման, ինչը ԱՄՆ իշխանություններին թույլ կտա ամեն տարի խնայել միլիոնավոր դոլար», - գրված է X սոցիալական հարթակում հրապարակված հաղորդագրության մեջ:
Սակայն Պետքարտուղարության այս հայտարարությունից հետո Պանամայի ջրանցքի վարչակազմը հայտնել է, որ համապատասխան սակագներում փոփոխություններ չի կատարել։ Reuters-ի փոխանցմամբ՝ վարչակազմը միևնույն ժամանակ հայտնել է, որ բաց է ԱՄՆ իշխանությունների հետ քննարկումների համար ռազմանավերի անցման պայմանների վերաբերյալ։ Ըստ Reuters-ի՝ սա կարող է ավելացնել ԱՄՆ-ի և Պանամայի միջև լարվածությունը, քանի որ այս ջրային ուղին հայտնվել է ԱՄՆ նոր վարչակազմի ուշադրության կենտրոնում։
ԱՄՆ նախագահ Դոնալդ Թրամփը պնդում է, որ Չինաստանը չափազանց մեծ ազդեցություն ունի Պանամայի ջրանցքում, և Պանամային մեղադրել է ամերիկյան նավերից մեծ գումար գանձելու մեջ։ Թրամփը սպառնացել է վերահսկողություն հաստատել ջրանցքի վրա։
Ըստ Պենտագոնի՝ փետրվարի 5-ին Պանամայի նախագահ Խոսե Ռաուլ Մուլինոն հեռախոսազրույցի ընթացքում ԱՄՆ պաշտպանության նախարար Փիթ Հեգսեթին հրավիրել է այցելել հանրապետություն՝ անվտանգության ոլորտում համագործակցությունը խորացնելու և «Պանամայի ջրանցքն արտաքին սպառնալիքներից պաշտպանելու» նպատակով։
