Իսպանիայի արտաքին գործերի նախարար Խոսե Մանուել Ալբարեսը մերժել է Իսրայելի պաշտպանության նախարար Իսրայել Կացի ծրագիրը՝ պաղեստինցիներին Գազայից այլ երկրներ, այդ թվում՝ Իսպանիա տեղափոխելու մասին։
Նախկինում Կացը հանձնարարել էր բանակին պատրաստել ծրագիր, որը թույլ կտա Գազայի բնակիչներին կամավոր լքել անկլավը և գնալ աշխարհի ցանկացած կետ:
Նախարարի խոսքով՝ առաջին երկրները, որոնք պարտավոր են ընդունել ցանկացած պաղեստինցու, նրանք են, որոնք «կեղծ մեղադրանքներ են ներկայացրել Իսրայելի հասցեին՝ Գազայի հատվածում նրա գործունեության պատճառով»։ Խոսքը Իսպանիայի, Իռլանդիայի, Նորվեգիայի մասին է։
«Իսպանիան ինքն է կայացնում իր ինքնիշխան որոշումները, և ոչ մի երրորդ կողմ չպետք է ասի նրան, թե ինչ անել, մենք ունենք հետևողական արտաքին քաղաքականություն, որն ասում է նույնը Ուկրաինայի և Պաղեստինի հետ կապված։ Մեր դիրքորոշումը շատ պարզ է», - ասել է Իսպանիայի ԱԳՆ ղեկավարը RNE ռադիոկայանին տված հարցազրույցում։
Նրա խոսքով՝ ոչ ոք չպետք է բանավեճի մեջ մտնի այն մասին, թե ուր պետք է գնան պաղեստինցիները և մասնավորապես Գազայի բնակիչները, քանի որ «պաղեստինցիների երկիրը Գազան է, որը պետք է լինի ապագա Պաղեստին պետության մաս, ինչպես ցանկանում են Իսպանիան և մոլորակի երկրների մեծ մասը»:
