Կառավարությունն իր այսօրվա՝ փետրվարի 6-ի նիստում հաստատեց վերակազմակերպված և գործունեությունը դադարեցված թանգարանների թանգարանային առարկաների հետագա տնօրինման և պահպանության կարգը:
Որոշման հիմնավորման մեջ նշվում է, որ թանգարանների վերակազմակերպման կամ գործունեության դադարեցման դեպքում թանգարանային առարկաների հետագա տնօրինման իրավական կարգավորման համար մինչ այժմ բացակայում է միասնական ընթացակարգը:
Ուստի նման իրավիճակներում թանգարանային առարկաների հետագա տնօրինումը, դրանց պատշաճ պահպանությունն ու անվտանգությունն ապահովելու նպատակով անհրաժեշտ է սահմանել միասնական ընթացակարգ:
Այս որոշման նպատակն է վերակազմակերպման կամ գործունեության դադարեցման դեպքում ՀՀ պետական սեփականություն հանդիսացող թանգարանային հավաքածուների հետ կապված իրավահարաբերությունների կարգավորումը:
