Մեծ Բրիտանիայի կառավարությունը կաջակցի Պաղեստինի ժողովրդին Գազայի հատվածի վերականգնման գործում, որպեսզի անկլավի բնակիչները կարողանան վերադառնալ տուն: Այս մասին հայտարարել է Մեծ Բրիտանիայի վարչապետ Քիր Սթարմերը՝ ելույթ ունենալով Համայնքների պալատում։
«Նրանց (Գազայի բնակիչներին) պետք է թույլ տան վերակառուցել անկլավը: Եվ մենք պետք է նրանց հետ լինենք վերակառուցման գործընթացում՝ երկու պետությունների միջոցով լուծման ճանապարհին»,- ասել է նա։
ԱՄՆ նախագահ Դոնալդ Թրամփը փետրվարի 4-ին Իսրայելի վարչապետ Բենիամին Նեթանյահուի հետ համատեղ մամուլի ասուլիսում հայտարարեց Վաշինգտոնի պատրաստակամությունը՝ զորքեր ուղարկել Գազա և սկսել անկլավի վերականգնումը, այն վերածելով «Մերձավոր Արևելյան Ռիվիերայի»։
Դրա համար ամերիկացի առաջնորդն առաջարկում է տեղի բնակիչներին վերաբնակեցնել հարևան երկրներ՝ Եգիպտոս և Հորդանան: Կահիրեն և Ամմանը դեմ են արտահայտվել պաղեստինցիների արտաքսմանը։
