Google-ը հայտարարել է, որ իր Project Gameface-ի սկզբնական կոդը հասանելի է դարձրել ծրագրավորողների համար, իսկ դա նշանակում է, որ ծրագրավորող ընկերությունները կարող են դրա հիման վրա պատրաստել Android օպերացիոն համակարգով աշխատող խաղեր, որոնց համար ձեռքերն անհրաժեշտ չեն լինի՝ խաղը հնարավոր կլինի խաղալ միմիկաների և գլխի շարժումների միջոցով։
Project Gameface-ի մասին ընկերությունը հայտարարել էր դեռ անցյալ տարի I/O 2023 համաժողովի ժամանակ։ Այն սկզբում ներկայացվել էր որպես խաղային մկնիկի նման մի բան, սակայն առանց ձեռքերի օգտագործման։ Մշակումը թույլ է տալիս կառավարել կուրսորը դեմքի արտահայտություններով կամ գլխի շարժումներով, որոնք ճանաչում է սարքի ներկառուցված տեսախցիկը: Օրինակ՝ օգտատերը կարող է բարձրացնել հոնքերը՝ էկրանին ինչ-որ բան ընտրելու և քաշելու համար, կամ բացել բերանը կուրսորը շարժելու համար: Ենթադրվում էր, որ դա խաղերի կառավարումն ավելի հարմար և պարզ կդարձնի:Project Gameface կոդն այժմ հասանելի է Android օպերացիոն համակարգի համար նախատեսված հավելվածներ մշակողների համար: Նրանք կարող են ստեղծել հավելվածներ, որոնցում օգտատերերը կարող են հարմարեցնել իրենց դեմքի արտահայտություններն ու ժեստերը՝ կառավարելու կուրսորը և օգտագործել դրանք՝ առանց ձեռքերի: Project Gameface-ը ճանաչում է օգտատիրոջ շարժումները և դրանք համապատասխանեցնում MediaPipe-ի Face Landmarks Detection API տվյալների բազայի հետ: Այն ներառում է դեմքի ավելի քան 50 հնարավոր արտահայտություններ և գլխի շարժումներ, որոնցից մի քանիսը մշակում է հենց Google-ը:Սկզբում Project Gameface-ը դիտվում էր միայն որպես խաղի կառավարման առաջադեմ գործիք, սակայն Google-ն այժմ նախատեսում է գտնել դրա այլ կիրառություններ: Նախագծի հեղինակները կարծում են, որ այն կարող է կիրառվել կրթական և աշխատանքային նպատակներով, սոցիալական ցանցերում շփման և այլ նպատակների համար։ Բացի դրանից՝ շարժական սարքի կառավարման այս մեթոդը կարող է օգտակար լինել սահմանափակ հնարավորություններով մարդկանց համար:
Մշակողներն արդեն կարող են Project Gameface-ը ներդնել իրենց հավելվածներում:
