Երևանի պետական համալսարանը և ԱՊՀ երկրներում «Kotler Impact» ընկերության բացառիկ ներկայացուցիչ «AWE Consulting» ՍՊԸ-ն ստորագրեցին համագործակցության հուշագիր՝ համատեղ ծրագրերի իրականացման նպատակով:
հուշագիրը ստորագրեցին ԵՊՀ ռեկտոր Հովհաննես Հովհանիսյանը, ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանը և ԱՊՀ երկրներում «Kotler Impact» ընկերության բացառիկ ներկայացուցիչ «AWE Consulting» ՍՊԸ-ի տարածաշրջանի տնօրեն Մերի Գրիգորյանը:
Հուշագրի նպատակն է կողմերի միջև հաստատել գործընկերային հարաբերություններ և իրականացնել համատեղ մի շարք ծրագրեր: Համագործակցության արդյունքում կհրատարակվի «Ժամանակակից մարքեթինգի հիմունքները. Հայաստանի հրատարակություն» գիրքը:
ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանը, կարևորելով նման համագործակցությունը, նշեց, որ այն կօգնի ուսանողների համար տարբեր մարքեթինգային միջոցառումներին մասնակցելու հնարավորություններ ստեղծել:
«Նախատեսվում է հայկական մարքեթինգային ընկերությունների անցած ճանապարհի և պատմության հիման վրա դասագիրք մշակել, որի ստեղծմանը կմասնակցի ֆակուլտետի անձնակազմը: Այնուհետ հնարավորություն ենք տալու ուսանողներին սովորել այդ ուսումնական ձեռնարկով, քանի որ մինչ այս մարքեթինգի հետ կապված տարբեր դասընթացների ընթացքում ֆակուլտետում ուսանողներին ներկայացվել են միջազգային խոշոր ընկերությունների օրինակները: Ձեռնարկը առանձնանում է հենց դրանով, քանի որ շատ կարոր է, որպեսզի մեր ուսանողները ծանոթանան նաև հայկական ընկերությունների հաջողության պատմություններին և մոտեցումներին»,-ասաց Խաչատրյանը:
ԱՊՀ երկրներում «Kotler Impact» ընկերության բացառիկ ներկայացուցիչ «AWE Consulting» ՍՊԸ-ի տարածաշրջանի տնօրեն Մերի Գրիգորյանի խոսքով՝ այն հաջողության պատմությունները, որոնք կտպագրվեն ձեռնարկում, կվերամշակվեն ԵՊՀ պրոֆեսորադասախոսական կազմի կողմից և կունենան ակադեմիական բովանդակություն:
«Գիրքը լույս է տեսնելու երկու լեզուներով: Սկզբում կտպագրվի անգլերեն տարբերակը՝ մոտ 10 հազար օրինակով: Այն վաճառվելու է ամբողջ աշխարհում, այնուհետև թարգմանվելու է հայերեն, որից հետո հույս ունենք, որ կկարողանանք գիրքը ներառել հայկական բոլոր բուհերի կրթական ծրագրերում»,- նշեց Մերի Գրիգորյանը:
Համագործակցության արդյունքում ԵՊՀ ուսանողները կստանան նաև «Մարքեթինգի համաշխարհային գիտաժողով»-ի մասնակցության տոմսեր:
