Իրանի ավիաընկերությունները մինչև հունվարի 22-ը չեղարկել են բոլոր չվերթերը դեպի Սիրիա, քանի որ երկու երկրների միջև օդային հաղորդակցությունը համաձայնեցված չէ Դամասկոսի նոր իշխանությունների հետ։ Ինչպես տեղեկացնում է ՏԱՍՍ գործակալությունը, այդ մասին հայտարարել է Իրանի Քաղաքացիական ավիացիայի կազմակերպության ղեկավար Հոսեյն Փուրֆարզանեն։
«Ներկայումս դեպի Սիրիա թռիչքներն արգելված են մինչև հունվարի 22-ը, բայց Լիբանանի վերաբերյալ սահմանափակումներ չկան», - ասել է Փուրֆարզանեն։
Ինչպես նշել է պաշտոնյան, օդային հաղորդակցությունը վերսկսելու համար անհրաժեշտ է թույլտվություն ստանալ մյուս երկրից։ Նույնպիսի իրավիճակ է Եգիպտոսի դեպքում։«Երկու երկրների իշխանությունները պետք է ընդհանուր հայտարարի գան, որ մենք կարողանանք թռիչքներ իրականացնել Իրանից Եգիպտոս և հակառակ ուղղությամբ», - հավելել է նա։
Նոյեմբերի վերջին զինված ընդդիմադիր խմբավորումները լայնածավալ հարձակում են սկսել սիրիական բանակի դիրքերի դեմ։
Դեկտեմբերի 8-ին նրանք մտել են Դամասկոս, Բաշար ալ-Ասադը թողել է Սիրիայի նախագահի պաշտոնը և լքել երկիրը՝ ապաստան ստանալով Մոսկվայում։ Դեկտեմբերի 10-ին Մուհամեդ ալ Բաշիրը, որը գլխավորում էր, այսպես կոչված, Փրկության կառավարությունն Իդլիբի նահանգում, հայտարարել է Սիրիայի անցումային շրջանի նախարարների կաբինետի ղեկավարի պաշտոնում իր նշանակման մասին. անցումային շրջանը կտևի մինչև 2025 թվականի մարտի 1-ը:
