Հայկական ֆիլմերը ադրբեջանական սպառնալիքների տակ հետ են կանչվել միջազգային կինոփառատոններից։
«Մոսկվա» կինոթատրոնի առջև հրավիրված մամուլի ասուլիսի ժամանակ ասաց գրող, հրապարակախոս Հովհաննես Իշխանյանը։
Դրանք են` Կատյա Սպիվակովայի «Այն ամենն, ինչ ինձ պետք է» ֆիլմը, որը Մարոկկոյի «Issni Nurgh» միջազգային փառատոնից է հանվել է, մյուսն էլ Սարին Հայրապետյանի «Տունս քաղցր ա» վավերագրական ֆիլմն է, որը Հորդանանը ներկայացրել էր «Օսկարի», հետո էլ հետ կանչել։
«Այս առիթով Հայաստանի դիվանագիտական հիմնադրամի հետ նամակ ուղղեցինք արտաքին գործերի և ԿԳՄՍ նախարարություններ, պատասխանն այն էր, որ «ռեժիսորները մեզ չեն դիմել, դրա համար այդ գործով չենք զբաղվում»։
Իհարկե, տարօրինակ է նրանց պատասխանը։ Ենթադրենք, եթե հանկարծ Ադրբեջանը որոշի Ստեփանակերտի Տատիկ-պապիկ արձանը ոչնչացնի, ի՞նչ է՝ պետք է քանդակագործ, լուսահոգի Սարգիս Բաղդասարյա՞նը դիմի ԱԳՆ։
Այս պատասխանը բավարար չէ»,- ասաց Իշխանյանը՝ հիշեցնելով, որ ռեժիսոր Ջիվան Ավետիսյանի «Դրախտի դարպասներ» ֆիլմը 2020 թվականի դեկտեմբերին հանվել էր Մոսկվայի միջազգային կինոփառատոնից։Նա հայտարարեց, որ իրենց ասուլիսով ազդարարում են՝ հայկական ֆիլմերի պաշտպանության համար գործընթաց են սկսում։
«Նամակներ ենք հղելու ԱԳՆ, որպեսզի դեսպանատներին՝ փառատոներում հայկական ֆիլմերի հարցը պահեն ուշադրության կենտրոնում, փառատոներին, որ նման խնդիր կա, մենակ չենք, մենք կարող ենք միասին պայքարել»,- ասաց Իշխանյանը։ Ըստ նրա՝ Հայաստանը բավարար պաշտպանություն ցույց չի տալիս իր կինոգործիչներին։
«Հայաստանի կառավարությունը փառատոների ժամանակ պետք է ցուցում տա դեսպաններին, որպեսզի գնան ու կանգնեն հայկական ֆիլմերի կողքին, համոզվեն, որ չեն հանի ծրագրից։ Հայաստանի կառավարությունն անգամ հայտարարություն չի արել, որ կանգնած են ռեժիսորների կողքին, հետամուտ են լինելու, որ նման բան չլինի։
Երբ չկա հակազդեցություն, ինչքան ուզեն, կանեն, երբ որ ԱԳՆ-ն չի արձագանքում, և փառատոնն է մնում մենակ, և ռեժիսորը, մյուս երկրի կառավարությունն էլ։
Մենք պետք է հիմնավորումներ ներկայացնենք, որ չեն կարող ֆիլմը գրաքննել»,- ասաց Իշխանյանը։
«Հայաքվե» նախաձեռնող խմբի անդամ Մենուա Սողոմոնյանն իր հերթին ասաց, որ իրենք դիմել են պատկան մարմիններին՝ ՀՀ ԱԳՆ, ԿԳՄՍՆ, որ միջամտեն գործընթացին։
Նրա խոսքով՝ գերատեսչություններում զանազան պատճառաբանություններ են բերել՝ նշելով, թե իրենք ոչինչ չեն կարող անել։
