Սիրիայում ահաբեկչական խմբավորումների ակտիվացման ֆոնին Դամասկոսում Իրանի դեսպանատան տարհանման մասին տեղեկատվությունը չի համապատասխանում իրականությանը, Mehr գործակալության փոխանցմամբ՝ ասել է Իրանի ԱԳՆ պաշտոնական ներկայացուցիչ Իսմայիլ Բաղային։
Ավելի վաղ հայտնել էինք, որ Times թերթը, վկայակոչելով աղբյուրներին, պնդել էր, որ Իրանը իբրև սկսել է տարհանել իր զինվորականներին, դիվանագիտական առաքելության անձնակազմին և նրանց ընտանիքներին, ինչպես նաև խաղաղ բնակչությանը Սիրիայից։
Նշվել էր, որ տարհանումը մասամբ իրականացվում է դեպի Թեհրան թռիչքներով, ինչպես նաև դեպի Լիբանան, Իրաք և սիրիական Լաթաքիա նավահանգիստ ցամաքային ուղիներով։
«Դամասկոսում Իրանի Իսլամական Հանրապետության դեսպանատան տարհանման մասին հաղորդագրությունը չի համապատասխանում իրականությանը, դեսպանատունը շարունակում է իր գործունեությունը նախկինի պես»,- ասել է Բաղային։
