Հարավային Կորեայի նախագահ Յուն Սեոկ Յոլը ներողություն է խնդրել երկրի բնակիչներից՝ ռազմական դրություն մտցնելու որոշման համար։ Այս մասին նա հայտարարել է հեռուստատեսային ուղիղ եթերում։
«Ես խորապես ներողություն եմ խնդրում իմ արարքների համար», - ասել է նա հեռուստատեսային ուղերձում: Յուն Սեոկ Յոլը խոստացել է պատասխանատվություն ստանձնել իր գործողությունների համար և չփորձել խուսափել պատժից:
«Ես չեմ պատրաստվում խուսափել քաղաքական և իրավական պատասխանատվությունից ռազմական դրության հայտարարման հետ կապված գործողությունների համար»,- ասել է նախագահը։
Նա նաև ընդգծել է, որ այլևս ռազմական դրություն չի հայտարարի. նման հնարավորությունը վերջին օրերին ակտիվորեն քննարկվում է հարավկորեական քաղաքական կառույցում և լրատվամիջոցներում։
«Ես ուղիղ կասեմ՝ երկրորդ ռազմական դրության նման իրավիճակ չի լինի»,- ասել է նա։ Նախագահը քաղաքացիներից ներողամտություն է խնդրել իր պատճառած անհանգստության և անհարմարությունների համար։
