Մասաչուսեթսի տեխնոլոգիական ինստիտուտի (MIT) և Տեխասի համալսարանի (Օսթին) հետազոտողների թիմը մետաղադրամի չափ շարժական 3D տպիչի նախատիպ է ստեղծել։Գիտնականների խոսքով՝ այս զարգացումն ամբողջությամբ փոխում է պատկերացումներն այն մասին, թե ինչպիսին պետք է լինի 3D տպիչը։ Եթե նախկինում դրանք ծավալուն սարքեր էին, որոնք մեծ տեղ էին զբաղեցնում, ապա այժմ խոսքը կոմպակտ շարժական սարքի մասին է։Գյուտի հիմնական բաղադրիչը հատուկ ֆոտոնային չիպն է, որը չունի շարժվող մասեր, բայց փոխարենը հիմնված է օպտիկական փոքր ալեհավաքների վրա՝ լույսի ճառագայթները կառավարելու համար: Չիպը տաքացվում է կոմպակտ մոդուլյատորների միջոցով, այնուհետև ճառագայթների ճշգրտությունը կարգավորելու համար օգտագործվում է էլեկտրական դաշտ տպագրությունն առավելագույն դետալիզացնելու համար:
Մեկ այլ կարևոր տարր է եզակի ֆոտոպոլիմերային խեժի օգտագործումը, որը կարծրանում է լույսի ներքո: Քիմիկոսներն ընտրել են նյութերի օպտիմալ բաղադրություն և կոնցենտրացիա, որն ապահովում է «երկար պահպանման ժամկետ և արագ կարծրացում» լույսի ճառագայթների ազդեցության տակ։ Սա հնարավորություն է տվել ընդամենը վայրկյանների ընթացքում 2D դետալներ տպել։Թիմը նախատեսում է օգտագործել նույն սկզբունքները՝ ստեղծելու 3D տպիչ, որը կաշխատի լուսազգայուն խեժով և թույլ կտա տպել բարդ եռաչափ մոդելներ մեկ անցումով: Հետազոտական խմբի հեղինակներից Ելենա Նոտարոսի խոսքով՝ սարքի աշխատանքը նախատեսվում է ցուցադրել մոտ ապագայում։«Այս համակարգն ամբողջությամբ վերասահմանում է, թե ինչ է 3D տպիչը: Սա այլևս պատվանդանի վրա դրված հսկայական տուփ չէ, այլ շատ շարժական բան: Հետաքրքիր է, թե ինչ նոր կիրառություններ այն կարող է ունենալ դրա արդյունքում և ինչպես կարող է փոխվել 3D տպագրության ոլորտը գլոբալ առումով»,- ասել է Նոտարոսը։
