Վերջին օրերին Թբիլիսիում ցուցարարների գործողությունների պատճառով ավելի քան 100 իրավապահ է տուժել, այդ թվում՝ ավելի քան 20-ը՝ անցած գիշեր։ Այս մասին ասվում է Վրաստանի ՆԳՆ հաղորդագրության մեջ։
«Դեկտեմբերի 1-2-ը ակցիայի մասնակիցների բռնի գործողությունների արդյունքում տուժել է ՆԳՆ 21 աշխատակից»,- ասված է հաղորդագրության մեջ։ Նրանց ցուցաբերվում է բուժօգնություն։
«Վերջին մի քանի օրվա ընթացքում բողոքի ցույցերի ընթացքում տուժել է ՆԳՆ 113 աշխատակից, որոնցից 4-ը մնում է կլինիկայում»,- նշել են ՆԳՆ-ում։
Գերատեսչության տվյալներով՝ Վրաստանի խորհրդարանի մոտ նախորդ գիշեր սկսված և մինչ օրս շարունակվող ցույցի ժամանակ ցուցարարները ոստիկանների ուղղությամբ նետել են քարեր, հրկիզվող առարկաներ, ապակե շշեր և մետաղական իրեր։
ՆԳՆ-ն ևս մեկ անգամ կոչ է անում ցուցարարներին բողոքել խաղաղ ճանապարհով, ապօրինի գործողությունները կճնշվեն ոստիկանության կողմից։
