ՀՀ վարչապետ Նիկոլ Փաշինյանը չի դադարում բանակի մասին ցնցող ու բանակի դերը նսեմացնող ելույթներով հանդես գալ: Այսօր էլ՝ նոյեմբերի 14-ին, ԱԺ-ում 2025 թվականի պետբյուջեի քննարկման ժամանակ` իր ամփոփիչ խոսքում, Փաշինյանը խորհուրդ տվեց դադարեցնել բանակի սրբագործման մոտեցումը, որովհետև դա 3-րդ Հանրապետության ընթացքում, իր ձևակերպմամբ, բոլորիս գործած մեծագույն սխալն է։
Պետք է նկատել, որ այսպիսի հայտարարություններ արվում են հետաքրքիր զուգադիպությամբ: Բանակում սպանությունների և ինքնասպանությունների թիվը գնալով աճում է, իսկ վարչապետը բանակի մարտունակությունը բարձրացնելու փոխարեն նմանատիպ հայտարարություններով հեղինակազրկում է բանակին ու զինծառայողներին:
Քաղաքական-հասարակական գործիչ Էդգար Ղազարյանը ԼՈւՐԵՐ.com-ի հետ զրույցում
Նիկոլ Փաշինյանին հայ ժողովրդի պատմության ամենամեծ թշնամին համարեց: Ղազարյանի խոսքով` նա թշնամաբար է տրամադրված բոլոր այն կառույցների նկատմամբ, որոնք կոչված են պաշտպանելու հայ ժողովրդին, ապահովելու նրա պաշտպանությունն, ապահովությունը և զարգացումը։
«Այստեղ ամենաառանցքային դերում Հայկական բանակն է, որը մշտապես եղել է, կա ու կշարունակի
մնալ այդ բարձրագույն դիրքում: Սրանից էլ հետևություն` նա (նկատի ունի Փաշինյանին ,-խմբ.) թշնամաբար է տրամադրված հենց բանակի նկատմամբ։
Նա մեր բանակին ամենամեծ հարվածն է հասցրել։ Կազմակերպել է պատերազմ, որպեսզի մեր բանակում հայ զինվորները զոհվեն: Նրա օրոք բանակին աննախադեպ կորուստ է հասցվել. միայն Արցախի ՊԲ-ին հասցված նյութական կորուստը կազմել է մոտավորապես 6,5 մլրդ դոլար»,- ընդգծեց Ղազարյանը:
Այս ամենին զուգահեռ, հասարակական-քաղաքական գործիչը շեշտեց` Փաշինյանը 44-օրյա արյունալի պատերազմից հետո` 2020-23 թթ.-երին, հետևողականորեն կազմաքանդել է Արցախի ՊԲ-ն: 2023 թվականին, երբ Արցախը կտրված էր ու չուներ արտաքին աշխարհի հետ ցամաքային սահման, Ղազարյանի խոսքով` վարչապետն Արցախին ու արցախցուն անպաշտպան է թողել:
«Արցախցիներին անպաշտպան թողեց, որ ադրբեջանցիները կոտորեն մեր հայրենակիցներին: Հիմա նույնն անում է մեր մնացած ժողովրդի հետ. Փաշինյանը պայքարում է մեր բանակի դեմ, որպեսզի թշնամին հեշտորեն կարողանա տիրանալ մեր երկրին»,- ասաց հասարակական-քաղաքական գործիչն ու հավելեց` մարդկանց թվում է, թե Փաշինյանը հայ է, այնինչ, Ղազարյանի խոսքով` նա Ադրբեջանի շահերը սպասարկող է:
Ավելին, այսօրվա իր խոսքում Փաշինյանը մեկ այլ ուշագրավ հայտարարություն ևս արեց: Մասնավորապես ասաց. «Բանակը, Պաշտպանության նախարարությունը մեր երկրի ամենամեծ հարկատուներից է, ՊՆ-ն առաջին 10 հարկատուների ցանկի մեջ է մտնում»։
Ղազարյանը այս հայտարարության մասին խոսելով ընդգծեց` սա էլ մի այլ տգիտություն է: Բացատրեց` ոչ թե բանակն է հարկատու, այլև այն զինվորները (սպաներ) , որոնց աշխատավարձից էլ պետությանը եկամտահարկ է վճարվում:
«Ախր այս մարդը ոչ կրթություն ունի, ոչ էլ...հիմա նրան մի բան բացատրենք` ի՞նչ կհասկանա...չէ՞ որ պիտի ինչ-որ բան սովորած լինի, որ հասկանա: Հիմա եկեք գնանք ու «Ախուրյանցի Անոյին» բացատրենք, թե ի՞նչ է եկամտահարկը...ի՞նչ կհասկանա այդ կինը»,- Նիկոլ Փաշինյանի և իր ամենահայտնի ֆանատի միջև զուգահեռներ անցկացնելով ասաց Ղազարյանը:
