Հոկտեմբեր ամսից սկսվել է սուր շնչառական վարակների սեզոնը։ Քաղաքացիները բողոքում են շնչառական խնդիրներից, վիրուսներից ու գրիպի նման արտահայտվող շնչառական հիվանդություններից, որոնք հաճախ թոքաբորբի են հանգեցնում:
Euromedia24.com-ը կապ հաստատեց ՀՀ ԱՆ ՀՎԿԱԿ-ի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանի հետ՝ հասկանալու՝ մեր երկրում սուր շնչառական վարակի համաճարակ կա՞: Աբովյանը նշեց, որ կանխատեսելի է դեպքերի աճը, որն էլ սեզոնին համահունչ է։ Այս պահին, սակայն, հիվանդությունների կտրուկ աճ չկա․ այն ընթանում է միջին ակտիվությամբ։ «Ընդհանուր դեպքերի 73%-ը արձանագրվել է 0-18 տարեկանների շրջանում։
Հոկտեմբերի 4-11 ընկած ժամանակահատվածում դիտվել է ՍՇՎ-ի հետ պայմանավորված միջին ակտիվություն։ Այդ ընթացքում գրիպով դիմած հիվանդների թիվը կազմել է 4621 հոգի։
Անցած տարվա նույն ժամանակահատվածի համեմատ դեպքերի թիվը ցածր է 1,1 անգամ» ,- ասաց Աբովյանը։ Ինչ վերաբերվում է հոսպիտալացման դեպքերին, ապա ՀՎԿԱԿ-ի վարակիչ և ոչ վարակիչ հիվանդությունների համաճարակաբանության վարչության պետի դիտարկմամբ՝ 400 հիվանդից նախորդ շաբաթվա 512-ի նկատմամբ, նվազում է դիտարկվում։ Այս դեպքում ևս թիրախային խմբում անչափահասներն են։
Դպրոցներում և կամ մանկապարտեզներում կանխարգելիչ միջոցառումներ են իրականացվում․ վստահեցրեց Աբովյանը։ «Թոքաբորբով հոսպիտալացվածների թիվը 1,1 անգամ աճել է» ,- շեշտեց նա։
Անդրադառնալով կորոնավիրուսի հավանական բռնկման դեպքերին, նշեց, որ վերջին 2 շաբաթվա ընթացքում գրանցվել է կորոնավիրուսով վարակվելու 53 դեպք, որն անցած տարվա համեմատ նվազել է 23-ով։ «Այս վերլուծության ցուցանիշները իրականացվում են դիմելիության արդյունքում, շատերը չեն դիմում բժշկի, քանի որ համեմատաբար ավելի թեթև են տանում» ,- ասաց Աբովյանն ու ևս մեկ անգամ շեշտեց՝ մեր երկրում սուր շնչառական վարակների համաճարակ չկա։
ՀՀ ԱՆ ՀՎԿԱԿ-ի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանի խորհուրդը մեկն է՝ չզբաղվել ինքնաբուժությամբ, մասնավորապես չկիրառել հակաբիոտիկներ առանց բժշկի նշանակելու
