Ուկրաինայի նախագահ Վլադիմիր Զելենսկիի աշխատակազմը դիմում է ուղարկել երկրի գլխավոր դատախազություն՝ Բելառուսի նախագահ Ալեքսանդր Լուկաշենկոյի դեմ քրեական վարույթ նախաձեռնելու խնդրանքով։ Այս մասին հուլիսի 31-ին տեղեկացրել է «Ուկրինֆորմ» լրատվական գործակալությունը։
Լրատվամիջոցի Telegram-ալիքում հրապարակված գլխավոր դատախազության հաղորդագրության մեջ նշվում է, որ նախագահի աշխատակազմից ստացված դիմումը գրանցվել է գլխավոր դատախազի աշխատակազմում հուլիսի 30-ին՝ իրավասության սահմաններում քննարկելու նպատակով։
Տեղեկացվում է, որ Զելենսկիի աշխատակազմի միջնորդությունն այժմ քննարկման փուլում է։ Գերատեսչության մամուլի քարտուղար Մարյանա Գայովսկայա-Կովբասյուկի փոխանցմամբ՝ այս հարցով որևէ քրեական վարույթ դեռևս հարուցված չէ։
«Ուկրինֆորմ»-ը նաև նշել է, որ քրեական գործ սկսելու առաջարկը Զելենսկիի աշխատակազմ է ներկայացվել Բելառուսում ծայրահեղական ճանաչված և Ուկրաինայի տարածքում գործունեություն ծավալող «Բելառուսի ժողովրդավարական ուժերի ֆորում» կազմակերպության կողմից։
Ռուսաստանի փոխարտգործնախարար Միխայիլ Գալուզինը հունիսի 29-ին հայտարարել էր, որ Զելենսկին Բելառուսի հասցեին հնչեցրած բանավոր սպառնալիքներից անցել է գործնական քայլերի՝ նախաձեռնելով ահաբեկչություններ։ Այսպես էր նա մեկնաբանել Ուկրաինայի զինված ուժերի հարձակումն այն ավտոբուսի վրա, որը երեխաներին փոխադրում էր մարզական մրցումների մասնակցելու համար։ Գալուզինն ընդգծել էր, որ նման գործողությունները արժանի են ամեն տեսակի դատապարտման և վճռական հակազդման։
Բելառուսի առաջնորդ Ալեքսանդր Լուկաշենկոն հունիսի 25-ին պատմել էր ուկրաինացի առաջնորդի ներկայացուցիչների հետ հանդիպման մասին, որի ընթացքում զգուշացրել էր Ուկրաինայի պատվիրակությանը, որ Մինսկին հակամարտության մեջ ներքաշելու Կիևի փորձն ակնթարթորեն կփոխի դրա որակը։ Միևնույն ժամանակ նա շեշտել էր, որ Բելառուսը չի ցանկանում պատերազմել ուկրաինացիների հետ, ովքեր իրենց հերթին չեն ցանկանում պատերազմել բելառուսների հետ։
