«Բարսելոնայի» նախկին պաշտպան, Իսպանիայի հավաքականի կազմում 2010 թվականի աշխարհի չեմպիոն Ժերար Պիկեն կիսվել է ԱԱ-2026-ի մեծ եզրափակիչից առաջ իր սպասումներով, որտեղ միմյանց դեմ կմրցեն Արգենտինայի և Իսպանիայի ազգային ընտրանիները։ Պիկեն հատուկ անդրադարձել է իր նախկին թիմակից և արգենտինացիների առաջատար Լիոնել Մեսսիին՝ ընդգծելով նրա բացառիկ խաղային ինտելեկտը։
«Մեսսին բազմաթիվ արժանիքներ ունի, և դրանցից մեկը նրա ինտելեկտն է։ Նա հիանալի գիտակցում է, որ այլևս 25 տարեկան չէ, սակայն գիտի, թե ինչպես զբաղեցնել այնպիսի դիրք, որտեղից կարող է առավելագույն վտանգ ստեղծել։ Բնածին եզակի տաղանդը թույլ է տալիս նրան ճիշտ պահեր գտնել տուգանային հրապարակ մտնելու, կարճ փոխանցումներով գրոհներին արագ միանալու կամ եզր տեղափոխվելով՝ ֆանտաստիկ փոխանցումներ կատարելու համար։ Ավելորդ է անգամ նշել, որ նա լավագույնն է գրոհների եզրափակիչ փուլում»,- Պիկեի խոսքերն է մեջբերում AS պարբերականը։
Իսպանացի նախկին ֆուտբոլիստը նաև զգուշացրել է իր հայրենակիցներին՝ ընդգծելով արգենտինական թիմի բազմակողմանի վտանգավորությունը.
«Կարծում եմ՝ Իսպանիայի հավաքականը սա լավ է յուրացրել։ Որքան էլ խաղացողներ կցեք Մեսսիին նրան կանգնեցնելու համար, նա միևնույն է՝ սողանցք կգտնի։ Իսկ եթե ոչ, ապա նրա վրա կենտրոնացած ուշադրությունը նպաստավոր պայմաններ կստեղծի արգենտինացի մյուս ֆուտբոլիստների համար, քանի որ Արգենտինայի հավաքականը միայն Մեսսին չէ։ Հուսով եմ, որ Իսպանիան կհաղթի, բայց եթե հաղթանակը տոնի Արգենտինան, ես անչափ ուրախ կլինեմ Մեսսիի համար»,- հավելել է Պիկեն։
ԱԱ-2026-ի գլխավոր հանդիպումը՝ Արգենտինա — Իսպանիա եզրափակիչը, կկայանա այսօր՝ հուլիսի 19-ին, ԱՄՆ-ի Իսթ-Ռութերֆորդ քաղաքի «Մեթլայֆ Սթեդիում» մարզադաշտում։ Հանդիպումը կմեկնարկի Երևանի ժամանակով 23:00-ին։ Լիոնել Մեսսին Արգենտինայի հավաքականի կազմում աշխարհի գործող չեմպիոնն է։
Հիշեցնենք նաև, որ Պիկեն և Մեսսին 2008-ից 2021 թվականներին միասին հանդես են եկել կատալոնական «Բարսելոնայում»՝ համատեղ նվաճելով 30 տիտղոս։
