Ռուս ռազմական փորձագետը կոչ է արել ամբողջությամբ անջատել Կիևի էլեկտրամատակարարումը
Ռուսաստանի պահեստազորի առաջին աստիճանի կապիտան և ռազմական փորձագետ Վասիլի Դանդիկինը հայտարարել է, որ ռուսական ուժերի առաջնահերթ թիրախները Ուկրաինայում պետք է լինեն ռազմավարական և ռազմական նշանակության ենթակառուցվածքները։ Նրա խոսքերը փոխանցում է aif.ru-ն։
Դանդիկինի խոսքով՝ հարվածները հասցվում են ի պատասխան Ռուսաստանի քաղաքների վրա իրականացվող հարձակումների և ուղղված են հրթիռների արտադրության, անօդաչու թռչող սարքերի հավաքման ձեռնարկություններին, ինչպես նաև կարևոր տրանսպորտային ու լոգիստիկ հանգույցներին։ Նա նշել է, որ հակառակորդի մատակարարման և ուժերի վերախմբավորման հնարավորությունները պետք է առավելագույնս սահմանափակվեն։
Ռազմական փորձագետը նաև հայտարարել է, որ Կիևը պետք է ամբողջությամբ զրկվի էլեկտրամատակարարումից։ Միաժամանակ Ռուսաստանի նախագահ Վլադիմիր Պուտինը հայտարարել է, որ Ուկրաինայի ղեկավարությունը փորձում է իր գործողություններով ավելի ուժեղ դիրքեր ցուցադրել հնարավոր նոր բանակցություններից առաջ, մինչդեռ, նրա գնահատմամբ, ռազմաճակատում իրավիճակն այլ է, և ռուսական ստորաբաժանումները շարունակում են առաջխաղացումը։
