Ազգային Ժողովի պատգամավոր, Վերահսկիչ պալատի նախկին նախագահ Իշխան Զաքարյանը և Գլխավոր դատախազությունը, հնարավոր է, հաշտություն կնքեն։ Այս հեռանկարի մասին հունիսի 15-ին Հակակոռուպցիոն դատարանում հայտարարեց Իշխան Զաքարյանի ներկայացուցիչ, փաստաբան Հակոբ Քոյլոյանը։ Այս մասին գրում է «Հետքը»:
Հակակոռուպցիոն քաղաքացիական դատարանում այսօր շարունակվեց դատախազության հայցի քննությունը, որով Իշխան Զաքարյանից և նրա ընտանիքի անդամներից պահանջվում է պետությանը վերադարձնել ապօրինի ծագում ունեցող գույքն ու դրամական միջոցները։
Գլխավոր դատախազության ապօրինի ծագում ունեցող գույքի բռնագանձման վարչության պետի տեղակալ, դատախազ Հռիփսիմե Ասատրյանը դատարանին խնդրեց թույլատրել փոխել հայցի հիմքը և առարկան։ «Հայցի առաջկայում փոփոխություններ եղել են ընկերությունների մասով, հայցի առարկայում կար անշարժ գույք, որը դուրս է եկել, նվազում է տեղի ունեցել դրամական պահանջի մասով, ավելացել է փոխառության պահանջը։ Որոշակի փոփոխություն է տեղի ունեցել ավանդների մասով»,- հայտարարեց դատախազ Հռիփսիմե Ասատրյանը՝ նշելով, որ Զաքարյանի ընտանիքի անդամների կողմից դատախազություն է ներկայացվել ապացույցներ, որոնք վերաբերվել են նրանց հաշիվներին անհայտ անձանց կողմից կատարված դրամական փոխանցումներին։ «Դրանք դիտարկվել են ոչ թե ապօրինի, այլ դիտարկվել են հաշվի համալրում և նվազեցումներ են իրականացվել Իշխան Զաքարյանի կանխիկ մուտքերից։ Նվիրատվության պայմանագրեր էլ կան»,- նշեց դատախազը։ Զաքարյանների ներկայացուցի Հակոբ Քոյլոյանը չառարկեց, որ փոխվի հայցի հիմքը և առարկան։ Դատավոր Լիլի Դրմեյանը բավարարեց դատախազության միջնորդությունը՝ թույլատրելով փոփոխել հայցի հիմքը և առարկան։
Դատարանը, երբ փորձեց պատասխանողների ներկայացուցչից պարզել, թե արդյո՞ք մեկ շաբաթից ավել ժամանակ է հարկավոր, որպեսզի փոփոխված հայցի վերաբերյալ դիրքորոշում ներկայացնեն, Հակոբ Քոյլոյանը հայտարարեց․«Ոչ հարգելի դատարան, բավարար է։ Կարծում եմ, եթե գնում ենք հաշտության, հաշտության տարբերակն ունենանք, կարծում եմ, բնականաբար, անհրաժեշտություն էլ չի լինի(դիրքորոշում ներկայացնելու), առարկություններով կլրացնենք»։ Այնուհետև փաստաբանը նշեց, որ մինչև հաջորդ նիստի նշանակումը շատ ժամանակ հարկավոր չէ, ապա հույս հայտնեց, որ հաշտության համաձայնություն ձեռք կբերվի և դատարանին խնդրեց հաջորդ դատական նիստը հնարավորինս շուտ նշանակել։
Դատախազությունը Իշխան Զաքարյանից և նրա ընտանիքի անդամներից ապօրինի ծագում ունեցող գույքի բռնագանձման հայցը դատարան է ներկայացրել 2024 թ․-ին։ Շուրջ երկու տարվա դատական քննության ընթացքում պաշտոնյայի և դատախազության միջև հաշտություն կնքելու մտադրության մասին երկրորդ անգամ է հայտարարվում։
Իշխան Զաքարյանը ԱԺ պատգամավոր է ընտրվել ՀՀԿ և Հայրենիք կուսակցությունների ընտրական ցուցակով 2021 թ․-ին, սակայն խորհրդարան մտնելուց որոշ ժամանակ անց Զաքարյանը դուրս եկավ ընդդիմադիր խմբակցությունից, ապա որպես անկախ պատգամավոր կողմ քվեարկեց ՔՊ-ի կողմից Հանրապետության նախագահի պաշտոնի համար ներկայացված թեկնածուի՝ Վահագն Խաչատուրյանի օգտին։
Դատախազությունը մինչ հայցի առաջարկայի փոփոխությունը Զաքարյանից և կնոջից պահանջում էր բռնագանձել Ակբա բանկում ներդրված 3.5 մլն դրամ ավանդը և 40 մլն դրամ գումարը, 610 մլն դրամ գումարը՝ որպես ապօրինի ծագում ունեցող գույքի վերափոխումից ստացված դրամական միջոց և 143 մլն դրամը, որը չի հիմնավորվել նրանց օրինական եկամուտով։ Պաշտոնյայի որդուց և նրա կնոջից դատախազությունը պահանջում է Երևանի կենտրոնում գտնվող գույքը, իսկ Զաքարյանի որդուց՝ Վարդան Զաքարյանից, պահանջում է հօգուտ Հայաստանի բռնագանձել Ծաղկաձորի մարզահամալիրի տարածքում գտնվող 1 շենք, Երևանի Բագրևանդ փողոցում գտնվող գույքը(Իշխան Զաքարյանի հայտնի առանձնատունը), «Հարվեստ» ՍՊԸ-ում, «Գրինպարկ» ՍՊԸ–ում նրան պատկանող բաժնեմասը և «Բամելեքս» ՍՊԸ-ին տրամադրված փոխառության չմարված մասի պահանջի իրավունքը(7մլն դրամ): Այսօրվա դատական նիստում հնարավոր չեղավ պարզել, թե ի՞նչ անշարժ գույք է դուրս եկել դատախազության պահանջից(հայցի առարկայի փոփոխությամբ)։
