Հորմուզի նեղուցի փակումը հանգեցրել է էներգակիրների և պարարտանյութերի գների կտրուկ աճի, ուստի նեղուցը պետք է լիովին վերաբացվի առանց սահմանափակումների: Այս մասին Նայրոբիում կայացած մամուլի ասուլիսում հայտարարել է ՄԱԿ-ի գլխավոր քարտուղար Անտոնիո Գուտերեշը:
«Մենք հետևում ենք գների կտրուկ աճին Հորմուզի նեղուցի փակման պատճառով և կարծում ենք, որ անհրաժեշտ է այն լիովին և առանց սահմանափակումների բացել: Մենք կոչ ենք արել երկու կողմերին էլ դա անել: Սա էներգիայի և պարարտանյութերի գները նախապատերազմյան մակարդակին վերադարձնելու միակ միջոցն է, և սա կենսական նշանակություն ունի Քենիայի նման երկրների համար», – ասել է Գուտերեշը:
ՄԱԿ-ի գլխավոր քարտուղարի խոսքով՝ մի քանի երկիր արդեն իսկ բախվում է պարենային ճգնաժամի վտանգի՝ պարարտանյութերի պակասի պատճառով։
«Հիմա ցանքի սեզոն է, և առանց պարարտանյութի, կարելի է պատկերացնել, որ հաջորդ տարի մենք ռիսկի ենք դիմում լուրջ պարենային անվտանգության խնդրի բախվելու։ Սա այն պահն է, երբ Հորմուզի նեղուցի առանց սահմանափակումների բացումը կարևոր է ամբողջ միջազգային հանրության շահերից ելնելով», – ընդգծել է նա։
«Իմաստ չունի, որ մի քանի երկրի միջև հակամարտությունն այնպիսի ազդեցություն ունենա, որը կխաթարի համաշխարհային տնտեսությունը», – հավելել է Գուտերեշը։
