Մերձավոր Արևելքում գերլարված իրավիճակի, ռմբակոծությունների հետևանքով Լիբանանի հայ համայնքն ունի աջակցության ու հոգածության կարիք:
Մոտ 250 հազարանոց գաղթօջախին օգնության ձեռք մեկնելու առաջին խոշոր արձագանքը Հայաստանից արվել է Գագիկ Ծառուկյանի կողմից:
Կարևորելով աշխարհի տարբեր անկյուններում բնակվող մեր հայրենակիցների միասնությունն ու դժվարին իրավիճակում միմյանց սատարելու հանգամանքը՝ Գագիկ Ծառուկյանը պատրաստակամություն է հայտնել Լիբանանի հայ համայնքին անհրաժեշտ օգնություն ցուցաբերել:
Արամ Ա-ի հետ Գագիկ Ծառուկյանը հեռախոսով խոսել է իր նախաձեռնությամբ՝ խոր մտահոգություն ու զորակցություն հայտնելով Լիբանանի հայ համայնքին:
Տարածաշրջանում չդադարող ռազմական գործողությունների ու հումանիտար աղետի առնչությամբ Արամ Ա-ն տեղեկություններ է փոխանցել ընդհանուր վիճակի մասին ու պայմանավորվել են մշտական կապ պահպանել ու ըստ իրավիճակի կոնկրետ աջակցության ծրագրեր քննարկել։
