«Մենք ներկայացնում էինք այն իրավիճակը, որն առկա է եղել։ Մասնավորապես օբյեկտիվ իրավիճակում տուժողներն նաև նախաքննության ընթացքում են արդարացնող ցուցմունքներ տվել՝ նշելով, որ Դավիթ և Գոռ Համբարձումյանները որևէ կերպ առնչություն չունեն իրենց կողմից նկարագրված դեպքերին»-Դատարանի դիմաց նիստից հետո ասաց Մասիս խոշորացված համայնքի նախկին ղեկավար Դավիթ Համբարձումյանի փաստաբան Գայանե Պապոյանը։
Նա նշեց, որ այդ մասին 9 տուժողները և վկաները պնդել են նաև դատաքննության ընթացքում, սակայն դատարանը գտել է, որ նրանց ցուցմունքներն արժանահավատ չեն, քանի որ նյութերում եղել է չճշտված աղբյուրից օպերատիվ գրություն, իբր թե որոշակի ճնշումներ են գործադրվել տուժածների և վկաների վրա, բայց վկաներից մեկն էլ ասում է, որ քննիչը գրել է, ինքը ստորագրել է, և այդ օպերատիվ հաղորդագրությունը ապացույց չի կարող հանդիսանալ։
«Դավիթ Համբարձումյանի մասով ամեն ինչ պարզ է, որովհետև կա գործի վերաբերյալ օբյեկտիվ ապացույց՝ տեսագրություն, որում հստակ երևում է, որ տուժողներին մի կողմում ծեծի են ենթարկում և դրան չեն մասնակցում Դավիթ և Գոռ Համբարձումյանները»,-ասաց փաստաբանը։
Նա նշեց, որ առաջին ատյանի դատարանը՝ դատավոր Չիչոյանի նախագահությամբ գործի հիմքում դրել է օպերատիվ գրություն, որն ապացույց չի կարելի համարել։
Դատարանը ավարտված նիստում, որոշեց մասնակի բավարարել պաշտպանի միջնորդությունը և երեխաներին խնամող Իրինա Ղուկասյանին թուլատրել այցելել Դավիթ Համբարձումյանի բնակության վայր։ Դատարանը նաև թուլատրեց Դավիթ Համբարձումյանին 16.02.2026 թվականին ժամը 13։30-16։00-ն մեկնել «Վարդանանց» ատամնաբուժական կենտրոն և 18.02.2026 թվականի ժամը 12։30 մեկնել նույն ատամնաբուժական կետրոն և 15։00-ին վերադառնալ բնակության վայր։
«Դատարանը մերժում է արգելքն ամբողջությամբ մերժելու պաշտպանական կողմի միջնորդությունը, նկատի ունենալով, որ ներկայացված չեն բավարար հիմնավորումներ և հանգամանքներ այն բավարարելու համար»,-որոշումը հրապարակեց դատավորը և դատական նիստը հետաձգեց մինչև մարտի 11-ը ժամը 15։00-ին։
