Իսրայելի իշխանությունները Միացյալ Նահանգներին նախազգուշացրել են, որ անհրաժեշտության դեպքում հրեական պետությունը կարող է միակողմանիորեն հարված հասցնել Իրանի տարածքին՝ առանց Վաշինգտոնի մասնակցության։ Այս մասին, հղում անելով իր աղբյուրներին, հաղորդել է իսրայելական The Jerusalem Post թերթը։
Պարբերականի տվյալներով՝ համապատասխան տեղեկությունը անցած շաբաթ Իսրայելի պաշտպանության նախարարության ներկայացուցիչները փոխանցել են Պենտագոնի պաշտոնյաներին։ Իսրայելական կողմը Վաշինգտոնին ներկայացրել է հնարավոր հարվածների իր ծրագրերը, որոնք կարող են իրականացվել որոշակի պայմանների դեպքում՝ կապված Իրանի բալիստիկ հրթիռների ծրագրի հետ։
«Մենք ամերիկացիներին հայտնել ենք, որ միայնակ հարված կհասցնենք, եթե Իրանը հատի մեր կողմից սահմանված կարմիր գիծը բալիստիկ հրթիռների հարցում», — նշել է թերթին Իսրայելի ռազմաքաղաքական ղեկավարության աղբյուրներից մեկը։ Նրա խոսքով՝ ներկայումս Իսրայելը չի տեսնում անմիջական հարված հասցնելու պայմաններ, սակայն շարունակում է իրավիճակի մշտադիտարկումը։ Վաշինգտոնի հետ երկխոսության ընթացքում հրեական պետության ներկայացուցիչները ընդգծել են, որ Իրանի նկատմամբ իրենց գործողությունների ազատությունը պահպանում են։
