Սաուդյան Արաբիայի պաշտպանության նախարար Խալիդ բին Սալման ալ Սաուդը կարծում է, որ ԱՄՆ-ի կողմից Իրանին հնարավոր հարված հասցնելու ժխտումը կամրապնդի Թեհրանի ղեկավարությունը։ Այս մասին հունվարի 30-ին հայտնել է Axios-ը՝ հղում անելով աղբյուրներին։
Նրանց տվյալներով՝ սաուդցի նախարարը այս դիրքորոշումը ներկայացրել է Վաշինգտոնում անցկացված փակ ճեպազրույցի ընթացքում, որին մասնակցել են տեղական վերլուծական կենտրոնների ղեկավարներ։ Դրանից մեկ օր առաջ, ինչպես նշում է Axios-ը, նա հանդիպում է ունեցել ԱՄՆ պետքարտուղար Մարկո Ռուբիոյի, պաշտպանության նախարար Փիթ Հեգսեթի, ԱՄՆ նախագահի հատուկ բանագնաց Սթիվեն Ուիթքոֆի, ինչպես նաև ԱՄՆ Զինված ուժերի Միացյալ շտաբների պետերի կոմիտեի նախագահ գեներալ Դեն Քեյնի հետ։
Ինչպես գրում է պորտալը, Սաուդյան Արաբիայի պաշտպանության նախարարը պնդել է, որ «տվյալ փուլում, եթե Իրանի դեմ հարվածը տեղի չունենա, դա միայն կուժեղացնի» Իրանի ղեկավարությանը։
Axios-ի փոխանցմամբ՝ սաուդցի նախարարը նաև կարծիք է հայտնել, որ ԱՄՆ նախագահ Դոնալդ Թրամփի վարչակազմը ստիպված կլինի ձեռնարկել ռազմական բնույթի քայլեր՝ միաժամանակ փորձելով խուսափել էսկալացիայից։
Axios-ը ընդգծում է, որ նման հայտարարությունները հակասում են Էր-Ռիադի պաշտոնական դիրքորոշմանը։
