Ֆրանսիայի վարչապետ Սեբաստյան Լեկորնյուն հայտարարել է, որ 2026 թվականի պետական բյուջեի մասին օրինագիծն ընդունվել է առանց խորհրդարանում քվեարկության՝ կառավարության պատասխանատվության ներքո։
«Ֆրանսիային անհրաժեշտ է բյուջե։ Այդ պատճառով ես, կառավարության անունից, ստանձնում եմ պատասխանատվությունը 2026 թվականի բյուջեի վերաբերյալ ամբողջ օրինագծի ընդունման համար՝ Սահմանադրության 49-րդ հոդվածի 3-րդ մասի հիման վրա», — ասել է նա Ֆրանսիայի Ազգային ժողովի (խորհրդարանի ստորին պալատ) նիստում։ Դրանից հետո Ազգային ժողովի փոխնախագահ Սեբաստյան Շենյուն հայտարարել է տվյալ օրինագծի շուրջ քննարկումների դադարեցման մասին։
Հինգշաբթի օրը Ֆրանսիայի Սենատը (խորհրդարանի վերին պալատ) քվեարկել է երկրի 2026 թվականի բյուջեի նախագծի ընդունման դեմ։ Պետական հաշվապահության համար պատասխանատու նախարար Ամելի դը Մոնշալենը քննարկումների ընթացքում ընդունել է, որ բյուջեի նախագիծը «անկատար» է, սակայն նշել է, որ այն քաղաքական բոլոր ուժերի միջև ձեռք բերված լայն փոխզիջման արդյունք է։
Կառավարության ներկայացրած 2026 թվականի բյուջեի օրինագիծը նախատեսում է ծախսերի կրճատում բոլոր ոլորտներում՝ բացառությամբ պաշտպանության, որտեղ, հակառակը, նախատեսվում է ծախսերի ավելացում՝ 6,7 միլիարդ եվրոյի չափով։
