Վերջին շաբաթների ընթացքում Թեհրանում սննդամթերքի գները կրկնապատկվել են՝ բողոքի ցույցերի և իրանական ռիալի արժեզրկման ֆոնին, պարզել է «ՌԻԱ Նովոստի»-ն։
Ամենաշատը թանկացել են ազգային խոհանոցի հիմքը կազմող ապրանքները։ Եթե երեք ամիս առաջ բրնձի մեկ պարկը արժեր ութից ինը միլիոն ռիալ, ապա այժմ դրա գինը հասնում է 24–30 միլիոն ռիալի։ Հունվարի սկզբին մեկ կիլոգրամ տավարի միսը հնարավոր էր գնել ութ միլիոն ռիալով, մինչդեռ այժմ դրա համար հարկավոր է վճարել 15-30 միլիոն ռիալ։
Վաճառողների խոսքով՝ գները կշարունակեն աճել, և հաջորդ թանկացումը սպասվում է շաբաթ օրը, երբ Իրանում կմեկնարկի նոր աշխատանքային շաբաթը։ Բացի այդ, մոտենում է մուսուլմանների համար սրբազան Ռամադան ծոմապահության ամիսը, իսկ դրանից անմիջապես հետո՝ իրանական օրացույցով Նոր տարվա տոնակատարությունը։
