Կա ռիսկ, որ Եվրոպան կհամաձայնվի Գրենլանդիան հանձնել Միացյալ Նահանգներին՝ փորձելով հաճոյանալ Վաշինգտոնին, հաղորդում է Bloomberg-ը՝ հղում անելով Շվեյցարիայի Դավոսում ընթացող Համաշխարհային տնտեսական ֆորումին մասնակցող բարձրաստիճան պաշտոնյայի։
Նրա խոսքով՝ Եվրոպայում շատերը համաձայն են, որ «Երկրորդ համաշխարհային պատերազմից հետո ստեղծված կարգն ավարտվել է», և որ ԱՄՆ նախագահ Դոնալդ Թրամփի տարածքային զավթումները կփոխեն համաշխարհային քաղաքականությունը։ Գործակալության աղբյուրը մտահոգություն է հայտնել, որ եվրոպացի առաջնորդները կարող են համաձայնվել հրաժարվել Գրենլանդիայից՝ «Սպիտակ տանը հանգստացնելու ևս մեկ փորձով»։
«Բլումբերգը» նաև նշում է, որ եվրոպացի պաշտոնյաները ապշած էին ԱՄՆ աջակցության կորստից և այն արագությունից, որ Վաշինգտոնը բարեկամական մոտեցումից անցավ թշնամականի։ Գործակալությունը նշում է, որ ոմանք խոստովանել են, որ դժվարանում են «արձագանքել անընդհատ փոփոխվող սպառնալիքների և պահանջների հեղեղին, որոնք հակասում են տրամաբանությանը»։
