Ճապոնիայի վարչապետ Սանաե Տակաիչին և նրա իտալացի գործընկեր Ջորջիա Մելոնին Տոկիոյում կայացած բանակցությունների ժամանակ համաձայնության են եկել շարունակել Ռուսաստանի նկատմամբ պատժամիջոցների կիրառումը և Ուկրաինային աջակցելը, հաղորդում է Kyodo լրատվական գործակալությունը։
Նշվում է, որ կողմերը նաև համաձայնության են եկել Տոկիոյի և Հռոմի միջև երկկողմ հարաբերությունները բարձրացնել «հատուկ ռազմավարական գործընկերության» մակարդակի։
«Երկու երկրների միջև համագործակցությունը լայն շրջանակի ոլորտներում հետևողականորեն զարգացել է, և Ճապոնիայի և Իտալիայի միջև հարաբերությունները զգալիորեն խորացել են», - նշել է Ճապոնիայի կառավարության ղեկավարը։
Հաղորդվում է նաև, որ երկու երկրների ղեկավարները համաձայնել են, որ Եվրոպայի և Հնդկա-խաղաղօվկիանոսյան տարածաշրջանի անվտանգությունը անբաժանելի է` հաստատելով իրենց վճռականությունը շարունակել համագործակցությունը՝ «ազատ և բաց Հնդկա-խաղաղօվկիանոսյան տարածաշրջանի» հայեցակարգը իրականացնելու համար։
