Վենեսուելայի նախագահ Նիկոլաս Մադուրոյի որդին՝ Նիկոլաս Մադուրո Գերրան, հրապարակային կերպով դիմել է հորը ԱՄՆ-ի կողմից նրա ձերբակալությունից հետո։ Այդ մասին հայտնում է բրիտանական Daily Mail-ը՝ նշելով, որ ելույթը հուզիչ է եղել և ուղեկցվել է արցունքներով։
Մադուրո Գերրան առաջին անգամ անդրադարձել է հոր ձերբակալությանը Վենեսուելայի Ազգային ասամբլեայում՝ Կարակասում, որտեղ պատգամավորները երդվել են նոր ժամկետով՝ մինչև 2031 թվականը։ «Պապա, դու մեզ բոլորիս ուժեղ մարդիկ ես դարձրել։ Մենք կատարում ենք մեր պարտքը, մինչև դու կվերադառնաս։ Հայրենիքը լավ ձեռքերում է, պապա, և շուտով մենք կրկին կգրկենք միմյանց այստեղ՝ Վենեսուելայում», — հայտարարել է նա՝ չթաքցնելով հուզմունքը։Նա նաև ընդգծել է, որ պետությունների ղեկավարների առևանգման հետ հաշտվելը նշանակում է, որ աշխարհում այլևս անվտանգ չէ որևէ երկիր։
Նրա խոսքով՝ այսօր թիրախում Վենեսուելան է, սակայն վաղը նման ճակատագրի կարող է արժանանալ ցանկացած պետություն, որը հրաժարվի ենթարկվել արտաքին ճնշումներին։ Ավելի վաղ Չինաստանի ԱԳՆ պաշտոնական ներկայացուցիչը պահանջել էր անհապաղ ազատ արձակել Նիկոլաս Մադուրոյին և նրա կնոջը՝ հայտարարելով, որ ԱՄՆ գործողությունները խախտում են միջազգային իրավունքի հիմքերը։
