Մենք շարունակում ենք մասնակցել ամբողջ աշխարհում հակամարտությունների կարգավորմանը, ներառյալ՝ այն հակամարտություններին, որոնք, գուցե, ամերիկյան առօրյա կյանքում կենտրոնական տեղ չեն գրավում, մամուլի հետ հանդիպման ժամանակ հայտարարել է ԱՄՆ պետքարտուղար Մարկո Ռուբիոն։
Նա ընդգծել է, որ ԱՄՆ նախագահ Դոնալդ Թրամփն իր առաջնահերթություն է համարում խաղաղապահի դերը։
«Այսպիսով, դուք տեսել եք՝ ինչպես ենք փոխազդում, լինի դա Ռուսաստանը և Ուկրաինան, Հնդկաստանը և Պակիստանը, Թաիլանդը և Կամբոջան, ինչը շարունակական խնդիր է, կամ ողբերգությունը, որն այժմ տեղի է ունենում Սուդանում, կամ էլ Հարավային Սուդանում լարվածության հնարավոր սրացումը և դրա փլուզումը։ Նկատի ունեմ՝ Անկախ նրանից՝ խոսքը Հայաստանի, թե Ադրբեջանի մասին է, մենք միշտ փնտրում ենք հնարավորություններ, եթե հնարավոր է, միջնորդի դեր խաղալու՝ պատերազմից խուսափելու կամ հակամարտությունները դադարեցնելու համար։ Եվ, ակնհայտ է, որ այդ դեպքերից շատերում դուք կարող եք մարդկանց սեղանի շուրջ նստեցնել և համաձայնություններ կնքել, այնուհետև ձեռնամուխ լինել գործընթացի իրագործմանը»,- շեշտել է ԱՄՆ պետքարտուղարը։
Մարկո Ռուբիոն ընդգծել է, որ ԱՄՆ-ն առաջընթաց է գրանցել վերոնշյալ իրավիճակներից շատերում, մասնավորապես՝ «նրանց որոշակի պայմաններին համաձայնեցնելու» հարցում։ «Ակնհայտ է, որ շարունակական աշխատանք է տարվում՝ ապահովելու համար, որ դրանք իրականացվեն և կիրառվեն գործնականում, և այդ հակամարտություններից մի քանիսը, ինչպես գիտեք, խոր արմատներ ունեն, որոնք գալիս են շատ, շատ տարիների պատմությունից։ Սակայն մենք պատրաստ ենք մասնակցել և այնպես օգնել, ինչպես այլ երկրներ, գուցե չեն կարող»,- նշել է ԱՄՆ պետքարտուղարը։
