Գերմանիայի կառավարությունը նոյեմբերի 24-ին կվերացնի Իսրայելին զենքի վաճառքի սահմանափակումները, որոնք սահմանվել էին մոտ երեքուկես ամիս առաջ։ DPA լրատվական գործակալությանը հայտնել է Գերմանիայի կաբինետի խոսնակ Ստեֆան Կոռնելիուսը։
Նա սահմանափակումների վերացումը բացատրել է Իսրայելի և պաղեստինյան արմատական շարժման՝ ՀԱՄԱՍ-ի միջև Գազայի հատվածում կնքված հրադադարով, որը ուժի մեջ է մտել հոկտեմբերի 10-ից, և որը, ըստ նրա, «վերջին շաբաթների ընթացքում կայունացել է»։
Գերմանիայի կառավարությունը այժմ «վերադառնում է [Իսրայել զենքի արտահանման] յուրաքանչյուր առանձին դեպքի ընդհանուր վերանայմանը և կարձագանքի իրավիճակի հետագա զարգացումներին», - նշել է Կոռնելիուսը։
Նա ընդգծել է, որ Գերմանիայի իշխանությունները կշարունակեն իրենց ջանքերը՝ Մերձավոր Արևելքում երկարատև խաղաղության հասնելու, Գազայի հատվածի բնակիչներին մարդասիրական օգնություն տրամադրելու և անկլավի վերակառուցումը խթանելու համար։
Օգոստոսի 8-ին Գերմանիայի կանցլեր Ֆրիդրիխ Մերցը հայտարարեց, որ Գերմանիայի կառավարությունը կասեցնում է Իսրայելին զենքի վաճառքի հաստատումը, որը կարող է օգտագործվել Գազայի հատվածում: Նա այս քայլի պատճառը նշեց իսրայելական բանակի կոշտ գործողությունները: Մերցը խստորեն քննադատության ենթարկվեց Քրիստոնեա-դեմոկրատական միության/Քրիստոնեա-սոցիալական միության դաշինքի անդամների կողմից:
