Եվրահանձնաժողովը (ԵՀ) ուրբաթ հայտարարել է, որ խստացնում է վիզային կանոնները Ռուսաստանի քաղաքացիների համար «անվտանգության աճող ռիսկերի» և «վիզաների հնարավոր չարաշահման» պատճառով, նաև չեղյալ է հայտարարում ռուսաստանցիների համար բազմակի վիզաները:
ԵՀ-ի հաղորդագրության համաձայն՝ այսուհետ ռուսաստանցիները այլևս չեն կարողանա ստանալ բազմակի մուտքի վիզաներ։ «Սա նշանակում է, որ Ռուսաստանի քաղաքացիները ստիպված կլինեն դիմել նոր վիզայի համար ամեն անգամ, երբ կծրագրեն մեկնել ԵՄ, ինչը թույլ կտա անցկացնել դիմորդների մանրակրկիտ և կանոնավոր ստուգում՝ ցանկացած հնարավոր անվտանգության ռիսկը մեղմելու համար»,- նշվում է փաստաթղթում։
Ըստ Եվրոպական հանձնաժողովի՝ այս միջոցառումների նպատակն է «նվազեցնել հասարակական կարգին և ներքին անվտանգությանը սպառնացող վտանգները՝ թույլ տալով բացառություններ սահմանափակ և արդարացված դեպքերում, օրինակ՝ անկախ լրագրողների և մարդու իրավունքների պաշտպանների համար»։
