Լեհաստանի ռազմաօդային ուժերի ՄիԳ-29 կործանիչներն այսօր առավոտյան օդ են բարձրացել՝ ենթադրաբար Բալթիկ ծովի վրայով թռչող ռուսական Իլ-20 ինքնաթիռը որսալու համար։ Այս մասին լրագրողներին հայտնել է Լեհաստանի պաշտպանության նախարար Վլադիսլավ Կոսինյակ-Կամիշը։
Նրա խոսքով՝ լեհական կործանիչներն իրենց առաքելությունն ավարտել են Մոսկվայի ժամանակով ժամը 10:49-ին։ «Այն (Իլ-20-ը – նշում է ՏԱՍՍ-ը) չի խախտել Լեհաստանի օդային տարածքը», - նախարարի խոսքերն է մեջբերում Wirtualna Polska պորտալը։
Նմանատիպ իրավիճակ էր ստեղծվել նաև հոկտեմբերի 28-ին, երբ Լեհաստանի ռազմաօդային ուժերի երկու ՄիԳ-29 կործանիչներ, որոնք հերթապահության մեջ էին, տեսողականորեն նույնականացրել էին Բալթիկ ծովի վրայով թռչող ռուսական Իլ-20 ինքնաթիռը և ուղեկցել այն Լեհաստանի պատասխանատվության գոտուց դուրս։
Ռուսաստանի պաշտպանության նախարարությունն ավելի վաղ հայտարարել էր, որ ռուսական ռազմական ինքնաթիռների բոլոր թռիչքները կատարվում են միջազգային օդային տարածքի կանոնակարգերի խիստ պահպանմամբ։
