Գազայի հատվածում հոկտեմբերի 28-ի երեկոյից ի վեր Իսրայելի կողմից իրականացված օդային հարվածների հետևանքով զոհերի թիվը հասել է 104-ի, հայտնել է պաղեստինյան անկլավի առողջապահության նախարարությունը։
Նրա խոսքով՝ զոհերի թվում են 46 երեխա և 20 կին։ Վիրավորվել է 253 պաղեստինցի։
WAFA լրատվական գործակալությունը, հղում անելով բժշկական փորձագետներին, հաղորդում է, որ պաղեստինյան թերթի լրագրող է զոհվել Գազայի հատվածի կենտրոնական մասում գտնվող Նուսեյրաթի փախստականների ճամբարի վրա Իսրայելի կողմից հասցված հարվածի հետևանքով։
Գործակալության տվյալներով՝ Իսրայելի ավիահարվածները ոչնչացրել են Գազայից արևմուտք գտնվող ալ-Շատի ճամբարի մի ամբողջ թաղամաս, որի հետևանքով կան մեծ թվով զոհեր։
Հոկտեմբերի 28-ի երեկոյան Իսրայելի վարչապետ Բենիամին Նեթանյահուն հրամայեց լայնածավալ հարված հասցնել Գազայի հատվածին։
Վարչապետը որոշումը կայացրել է զինվորականների հետ հանդիպման ժամանակ, այն բանից հետո, երբ Համասի կողմնակիցները, ըստ իսրայելական կողմի, խախտել են հրադադարը՝ կրակելով իսրայելական զորքերի վրա Գազայի հատվածի հարավային Ռաֆահ շրջանում։
