Հյուսիսային Կորեայի առաջնորդ Կիմ Չեն Ընը միջուկային գիտնականների և տեխնիկական փորձագետների հետ հանդիպման ժամանակ միջուկային մարտի նախապատրաստությունը անվանել է երկրի անվտանգության ապահովման գերակա խնդիր, հաղորդում է Կորեայի կենտրոնական լրատվական գործակալությունը (KCNA):
«Կիմ Չեն Ընը վճռականորեն հայտարարեց, որ պետության միջուկային դիմակայության պատրաստվածության հետագա բարձրացումը անհրաժեշտ առաջնահերթ խնդիր է հանրապետության անվտանգության միջավայրի ապահովման տեսանկյունից, պետության ներկայի և ապագայի համար ամենաճիշտ ընտրությունը, անփոփոխ պարտականություն, որին մենք պետք է հետևենք», - հաղորդում է KCNA-ն։
Գործակալության տվյալներով՝ Կիմ Չեն Ընը նշել է, որ «միջուկային վահանն ու սուրը» նախատեսված են երկրի շահերի և իրավունքների պաշտպանությունը երաշխավորելու համար, և որ ռազմավարական միջուկային ներուժի տիրապետումը «ապագա անվտանգության հուսալի երաշխիք է»։
