Իրանը պատրաստ է իր միջուկային օբյեկտներում ստուգումներ անցկացնել Միջուկային զենքի չտարածման մասին պայմանագրի (NPT) համաձայն՝ խստորեն պահպանելով իր միջազգային իրավունքները։ Այս մասին Fox News-ին տված հարցազրույցում հայտարարել է Իրանի նախագահ Մասուդ Փեզեշքիանը։
Նա նշել է, որ Միացյալ Նահանգները միակողմանիորեն դուրս է եկել Իրանի միջուկային ծրագրի վերաբերյալ Համատեղ համապարփակ գործողությունների ծրագրից (JCPOA):
«Դրանից հետո եվրոպացիները և տարբեր ընկերություններ, որոնք եկան, մեզ հետ պայմանագրեր կնքեցին և համագործակցության համաձայնագրեր ստորագրեցին, ստիպված եղան լքել Իրանը և չկատարեցին իրենց ստորագրած ոչ մի պայմանագիր», - ընդգծել է Փեզեշքիանը։
«Մեր փորձագետները, հնարավոր է՝ ստանդարտ համաձայնագրերի շրջանակից դուրս, շարունակեցին իրենց գործունեությունը։ Մենք բազմիցս հայտարարել ենք և կշարունակենք հայտարարել, որ պատրաստ ենք անհապաղ տրամադրել ստուգումների համար անհրաժեշտ ամեն ինչ, բայց միայն այն պայմանով, որ հարգվեն մեր միջազգային իրավունքները՝ համաձայն ԱԷՄԳ-ի հովանու ներքո գործող Միջուկային զենքի չտարածման մասին պայմանագրի», -ասել է Իրանի նախագահը։
