Սերբ թենիսիստ Նովակ Ջոկովիչը դարձել է բաց դարաշրջանի պատմության ամենատարեց խաղացողը, ով մեկ տարվա ընթացքում հասել է «Մեծ սաղավարտի» բոլոր չորս մրցաշարերի քառորդ եզրափակիչ (38 տարեկան և 94 օրական)։
US Open-2025-ի 1/8 եզրափակչում Ջոկովիչը վստահ հաղթանակ է տարել գերմանացի Յան-Լեննարդ Շտրուֆի (աշխարհի 144-րդ ռակետ) նկատմամբ՝ 6:3, 6:3, 6:2 հաշվով։ Այս հաղթանակը նրա կարիերայի 64-րդ քառորդ եզրափակիչն էր «Մեծ սաղավարտի» մրցաշարերում։
Opta Sport-ի տվյալներով՝ Ջոկովիչը դարձել է պատմության առաջին թենիսիստը, ով բոլոր չորս «Մեծ սաղավարտի» մրցաշարերի քառորդ եզրափակիչ է հասել ինը տարբեր մրցաշրջաններում։
Բացի այդ, սերբ լեգենդը 14-րդ անգամ դուրս է եկել US Open-ի քառորդ եզրափակիչ՝ սահմանելով ևս մեկ ռեկորդ։
Հաջորդ փուլում աշխարհի յոթերորդ ռակետ Ջոկովիչը կմրցի ամերիկացի Թեյլոր Ֆրիցի (աշխարհի 4-րդ ռակետ) հետ։
US Open-2025-ի տղամարդկանց մենախաղի մրցաշարը կայանում է օգոստոսի 24-ից սեպտեմբերի 7-ը։ Մրցաշարի մրցանակային ֆոնդը կազմում է 90 միլիոն ԱՄՆ դոլար։
