Սիրիայի ժամանակավոր նախագահ Ահմեդ ալ-Շարաան ողջունել է ԱՄՆ ֆինանսների նախարարության որոշումը՝ Դամասկոսը պատժամիջոցների ցանկից հանելու վերաբերյալ, ինչը, նրա խոսքով, կամրապնդի կայունությունը Մերձավոր Արևելքում:
Այս մասին ասվում է Արաբական Հանրապետության արտաքին գործերի նախարարության հայտարարության մեջ, որը հրապարակվել է X-ում:Այնտեղ նշվում է, որ սիրիացի քաղաքական գործիչը Դամասկոսում հանդիպել է Կոնգրեսի պատվիրակության հետ, որի կազմում էին սենատոր Ջին Շահինը (դեմոկրատ, Նյու Հեմփշիր) և ներկայացուցիչների պալատի անդամ Ջո Ուիլսոնը (հանրապետական, Հարավային Կարոլինա):
«Սիրիայի հանումը պատժամիջոցների ցանկից նոր էջ է բացում երկկողմ հարաբերություններում։ Այս քայլը կամրապնդի տարածաշրջանի անվտանգությունը և դրական ազդեցություն կունենա տնտեսական և մարդասիրական իրավիճակի վրա»,-նշել է ալ-Շարաան։
Նա ընդգծել է Դամասկոսի հանձնառությունը «միջազգային գործընկերների հետ երկխոսության և համագործակցության՝ փոխադարձ հարգանքի սկզբունքների հիման վրա»։
