Նիստին մասնակցել են Բարձրագույն կրթության և գիտության նախագահ Սարգիս Հայոցյանը, Գնահատման և թեստավորման կենտրոնի տնօրեն Արմեն Փաշայանը, տեղակալ Կարո Նասիբյանը, բուհերի ռեկտորներ և պրոռեկտորներ։
Հանրապետական ընդունող հաձնաժողովը նախ հաստատել է օրակարգը, այնուհետև քննարկել է ՀՀ բուհերի՝ 2025-2026 ուստարվա՝ ըստ մասնագիտությունների առկա ուսուցմամբ բակալավրի ու անընդհատ և ինտեգրացված կրթական ծրագրերով ընդունելության հիմնական փուլի նախնական, այդ թվում՝ օրենքով սահմանված արտոնություններ ունեցող դիմորդների արդյունքները:
Գնահատման և թեստավորման կենտրոնի տնօրեն Արմեն Փաշայանը ներկայացրել է ընդունելության հիմնական փուլի նախնական արդյունքները՝ նշելով, որ ընդունելության քննությունների արդյունքները հրապարակվելու են հուլիսի 18-ին:
Այս տարի ևս դիմորդներն ընդունելության քննություններ են հանձնել 2 անգամ. առաջին փուլը կազմակերպվել է հունվարին, իսկ երկրորդ և երրորդ փուլերի քննություններն անցկացվել են հունիս և հուլիս ամիսներին:
ԳԹԿ տնօրեն Արմեն Փաշայանը տեղեկացրել է, որ ՀՀ կառավարության որոշմամբ բուհերի ընդունելության նպատակով հատկացվել է 12126 տեղ, որից 2142-ը՝ անվճար, իսկ 9984-ը՝ վճարովի: Վճարովի համակարգ այս տարի ընդունվել է 9547 դիմորդ, իսկ անվճար՝ 1898:
Նախարար Ժաննա Անդրեասյանը, ծանոթանալով ընդհանուր տվյալներին, հետաքրքրվել է թափուր մնացած տեղերի և այլ օրակարգային հարցերով: Հանձնաժողովի նիստում քննարկվել է նաև թափուր տեղերի մրցույթի կազմակերպման հարցը:
Անդրադառալով ազգային փոքրամասնություններին տրվող նպատակային տեղերի բաշխման հարցին՝ որոշվել է դրանք հատկացնել վճարովի համակարգ ընդունված այն դիմորդներին, որոնք հաղթահարել են քննությունների ընդհանուր առավելագույն միավորի 75%-ը (առնվազն 30 միավոր)։ Այդ թիմորդների թիվը 11 է, որոնցից 5-ը՝ իգական սեռի:
ԳԹԿ տնօրենը տեղեկացրել է, որ 114 դիմորդ չի հայտագրել բուհը և մասնագիտությունը: Նիստի ընթացքում որոշվել է միասնական քննություններ հանձնած, սակայն բուհ և մասնագիտություն չհայտագրած դիմորդներին մասնագիտությունների հայտագրման լրացուցիչ փուլից հետո` հիմնական փուլի մրցույթի արդյունքներով բուհ չընդունված դիմորդների հայտագրումից և մրցույթի անցկացումից հետո առկա թափուր տեղերի պարագայում նրանց հայտագրվելու և մրցույթին մասնակցելու հնարավորություն ընձեռել:
Նիստում քննարկվել են նաև ընթացիկ մի շարք հարցեր:
