Մեծ Բրիտանիայի վարչապետ Քիր Սթարմերը հայտարարել է, որ լիովին վստահում է ֆինանսների նախարար Ռեյչել Ռեվսին, որը խորհրդարանում հայտնվել էր զգացմունքային ծանր վիճակում՝ բարեկեցության համակարգի փոփոխությունների հետ կապված մի շարք հետքայլերից հետո։
Համաձայն Reuters-ի՝ Ռեվսը տեսախցիկների առջև երևացել է հոգնած և հուզված՝ հաջորդ օրը այն բանից հետո, երբ կառավարությունը ստիպված եղավ բարեփոխումների նախագծից հանել այն կետերը, որոնք երկարաժամկետում մեծ խնայողություններ էին նախատեսում։ Այս քայլը առաջացրել է բյուջետային լուրջ ճնշումներ։
Որոշ ընդդիմադիր գործիչներ Ռեվսին մեղադրում են խիստ խնայողության առաջարկների համար, որոնք, ըստ նրանց, վնասում են առավել խոցելի խավերին։ Բարեփոխումների մեղմացումը նշանակում է, որ կառավարությունը ստիպված կլինի կամ բարձրացնել հարկերը, կամ կրճատել ծախսերը՝ պետական բյուջեն հավասարակշռելու համար։ Սթարմերի մամուլի քարտուղարը նշել է, որ վարչապետը բազմիցս հաստատել է իր աջակցությունը Ռեվսին և չի պատրաստվում յուրաքանչյուր քաղաքական հարձակումից հետո դա նորից կրկնել։
