Ուկրաինան չպետք է ընդունվի Եվրոպական Միություն և ՆԱՏՕ, քանի որ դա կհանգեցնի Արևմտյան երկրների և Ռուսաստանի միջև պատերազմի։ Այս նախազգուշացումը հնչեցրեց Հունգարիայի վարչապետ Վիկտոր Օրբանը՝ հունիսի 24-25-ը Հաագայում Հյուսիսատլանտյան դաշինքի գագաթնաժողովին մեկնելիս։ Դրանից անմիջապես հետո Բրյուսելում հունիսի 26-27-ը կկայանա ԵՄ գագաթնաժողովը։
«Եթե ԵՄ-ն ընդուներ Ուկրաինային իր շարքերը, դա անմիջապես կնշանակեր նրա համար բաց պատերազմ, իսկ հրադադարից հետո՝ Եվրոպայի և Ռուսաստանի միջև պատերազմի մշտական ռիսկ», - գրել է կառավարության ղեկավարը Facebook-ում:
Միևնույն ժամանակ, «Ուկրաինայի` ՆԱՏՕ-ին անդամակցությունը կնշանակեր անհապաղ պատերազմ Ռուսաստանի հետ և երրորդ համաշխարհային պատերազմի վտանգ», - նշել է Օրբանը։
«Հետևաբար, Ուկրաինան չպետք է ընդունվի ՆԱՏՕ կամ Եվրամիություն։ Հունգարիայի հիմնարար անվտանգության շահերից է բխում չլինել Ուկրաինայի հետ ընդհանուր ինտեգրացիոն կառուցվածքի մաս», - համոզված է վարչապետը։
Այս հայտարարության պատճառը ոչ միայն ՆԱՏՕ-ի և ԵՄ գագաթնաժողովներն էին, այլև Բուդապեշտում մի շարք հունգարացի քաղաքական և հասարակական գործիչների կողմից Ուկրաինային աջակցելու հռչակագրի հրապարակումը։
