ՄԱԿ-ի Սիրիայի մարդասիրական հարցերով համակարգող Ադամ Աբդելմուլան դատապարտել է հունիսի 22-ին Դամասկոսում եկեղեցու վրա ահաբեկչական հարձակումը, որի հետևանքով զոհվել է առնվազն 20 և վիրավորվել ավելի քան 50 մարդ: Նա կոչ է արել միջոցներ ձեռնարկել քաղաքացիական բնակչությանը պաշտպանելու համար, հայտնել է ՄԱԿ-ի մարդասիրական գործերի համակարգման գրասենյակը (OCHA):
«Ես խստորեն դատապարտում եմ Դամասկոսի Սուրբ Եղիա մարգարե եկեղեցում տեղի ունեցած ողբերգական միջադեպը, որտեղ մահապարտ ահաբեկիչը հարձակվել է աղոթքի հավաքված խաղաղ բնակիչների վրա», - ասել է Աբդելմուլան։
«Մենք կոչ ենք անում համապատասխան մարմիններին ձեռնարկել բոլոր անհրաժեշտ միջոցները՝ քաղաքացիական բնակչության պաշտպանությունն ապահովելու, մեղավորներին պատասխանատվության ենթարկելու և նման ողբերգությունները այլևս չկրկնելու համար», - ընդգծել է ՄԱԿ-ի համակարգողը։
Քանի որ «Սիրիան ընտրում է վերականգնման, հաշտեցման և վերակառուցման ուղին», - շարունակել է Աբդելմուլան, - «բռնության և ծայրահեղականության» համար տեղ չպետք է լինի։
Հիմա «միասնության, հանդուրժողականության և համերաշխության ժամանակն է՝ «բոլոր սիրիացիների համար ավելի լավ ապագա ստեղծելու համար», - ասել է նա։ ՄԱԿ-ի համակարգողը հայտնել է «իր խորին ցավակցությունը զոհերի ընտանիքներին և Սիրիայի ժողովրդին»՝ վերահաստատելով համաշխարհային կազմակերպության հանձնառությունը՝ աջակցելու Սիրիային և նրա ժողովրդին։
