ԱՄՆ-ն ուժեղացնում է անվտանգությունը Իրանին հասցրած հարվածներից հետո

22.06 11:31 | Կատեգորիա Համաշխարհային

Իրանին ԱՄՆ-ի հարվածներից հետո ամերիկյան իրավապահներն ուժեղացրել են անվտանգության միջոցառումները և ուշադիր հետևում են երկրի ներսում հնարավոր սպառնալիքներին։ Այս մասին հայտնում է СNN-ը։

Շաբաթ օրը Իրանին ԱՄՆ-ի հասցրած ավիահարվածներից հետո ամերիկյան իրավապահ մարմիններն ուժեղացրել են դիտարկումը Մերձավոր Արևելքում՝ ուշադիր վերլուծելով երկրի համար հնարավոր սպառնալիքների վերաբերյալ հետախուզական տվյալները։

Ըստ CNN-ի, համակարգմանը ծանոթ աղբյուրի, ԱՄՆ Ներքին անվտանգության նախարարությունը, ՀԴԲ-ն և դաշնային, նահանգային ու տեղական մակարդակի այլ գերատեսչություններ ուշադիր հետևում են ԱՄՆ գործողություններին Իրանի կամ այլ երկրների հնարավոր արձագանքին։

Ներքին անվտանգության նախարարության ղեկավար Քրիսթի Նոեմը սոցցանցերում նշել է, որ գերատեսչությունն աշխատում է հայրենիքի անվտանգության ամրապնդման ուղղությամբ։

Նյու Յորքի և Վաշինգտոնի (Կոլումբիայի շրջան) ոստիկանությունը հայտնել է դաշնային գործընկերների հետ հետախուզական տվյալների փոխանակման և կրոնական օբյեկտների մոտ իրավապահների ներկայության ուժեղացման մասին։ Թեև ԱՄՆ մայրաքաղաքի համար ուղղակի սպառնալիքներ առայժմ չեն արձանագրվել, տեղական իշխանությունները միջոցներ են ձեռնարկում բնակչությանը, բիզնեսին և զբոսաշրջիկներին պաշտպանելու համար։

Անվտանգության ուժեղացված միջոցներ են սահմանվել նաև Վաշինգտոնի ռազմավարական օբյեկտների, մասնավորապես՝ Սպիտակ տան, Պենտագոնի և Իսրայելի դեսպանատան շուրջ։ Սա նման մասշտաբի հակամարտությունների դեպքում կիրառվող ստանդարտ արձանագրության մաս է։

Նյու Յորքի ոստիկանությունը հայտարարել է, որ անվտանգության նկատառումներից ելնելով՝ լրացուցիչ ռեսուրսներ է ուղղում քաղաքի կրոնական, մշակութային և դիվանագիտական հաստատությունների պահպանությանը։