Մենք այսօր որպես պետություն ավելի անկախ ենք, քան երբևէ, ավելի ինքնիշխան ենք, քան երբևէ, ավելի պետություն ենք, քան երբևէ։ Այդ մասին, այսօր՝ հունիսի 19–ին, Ազգային ժողովում 2024 թվականի պետբյուջեի կատարման տարեկան հաշվետվության քննարկման ամփոփիչ ելույթի ժամանակ հայտարարեց ՀՀ վարչապետ Նիկոլ Փաշինյանը։
«Այսօրվա արձանագրումը իրականում ամենակարևորը չէ, կարևորը ի վերջո, քանի որ նաև խոսք է գնում այն ցիկլի մասին, որը մեկնարկել է 2021 թվականի խորհրդարանական ընտրություններով, որտեղ մեր կարգախոսն էր «Ապագա կա, կա ապագա», շատ կարևոր է նաև ի վերջո պատասխանել այդ հարցին՝ լավ մենք այդ կարգախոսը իրագործեցի՞նք, թե՞ չիրագործեցինք, կա՞ ապագա, թե՞ չկա ապագա։
Սա էլ է ինձ համար գրեթե ամենօրյա խորհրդատվության նյութ և այդ խորհրդատվության արդյունքում ես եկել եմ հետևյալ եզրակացության։ Ի՞նչն է գործնականում նշանակում, որ կա ապագա և ի՞նչն է գործնականում նշանակում, որ չկա ապագա։ Եթե կա ապագայի նախագիծ, հստակ գծագրված, ուրեմն կա ապագա։ Եթե չկա ապագայի հստակ գծագրված նախագիծ, Ուրեմն, չկա ապագա։
Այո, մենք այդ խնդիրը լուծել ենք, որովհետև այն, ինչ մենք այսօր հանրությանը ներկայացնում ենք որպես իրական Հայաստանի գաղափարախոսություն, դա ապագայի հստակ գծագրված նախագիծ է և այդ նախագծի գոյություն ն է երաշխիքը այն բանի, որ կա ապագա և այդ ապագան ունի շատ կոնկրետ պարամետրեր, և այդ պարամետրերից կարևորագույնը սեփական միջավայրում հարևանների հետ կարգավորված հարաբերություններ ունենալն է, լիարժեք և ամբողջական հարևանների միջազգայնորեն ճանաչված տարածքների ամբողջականությունը ճանաչելը և դրանով սեփական տարածքային ամբողջականությունը, ինքնիշխանությունը և անկախությունը ճանաչելը։
Ես ուզում եմ հստակ արձանագրել, որ վերջին յոթ տարիների պատմությունը, ինչքան էլ փորձ արվի այլկերպ ներկայացնել, հենց այս համատեքստում, հենց այս տեսակետից հաջողության և ոչ թե անհաջողության պատմություն է»,– հայտարարեց Նիկոլ Փաշինյանը։
